ФСБ: Затрыманыя двое падазраваных у забойстве Нямцова

ФСБ Расеі абвясціла аб затрыманні падазраваных у забойстве лідара апазіцыі.

У жывым эфіры Першага канала імёны затрыманых назваў кіраўнік ФСБ Аляксандр Бортнікаў.

«У выніку праведзенай дзейнасці затрыманыя двое падазраваных ва ўчыненні гэтага злачынства. Гэта - Губашаў Анзор і Дадаеў Заур», - заявіў ён.

Бортнікаў дадаў, што «на сённяшні момант доўжацца аператыўныя і неабходныя следчыя мерапрыемствы».

Барыс Нямцоў быў забіты ўвечары 27 лютага ў цэнтры сталіцы. У яго стрэлілі шэсць разоў. Распачатая справа паводле артыкулаў аб забойстве і незаконным абарачэнні зброі.

Забойства Нямцова ўзрушыла палітыкаў і грамадскіх дзеячаў у Расеі і за мяжой. 1 сакавіка тысячы чалавек выйшлі на акцыю памяці палітыка ў Маскве.

У мінулы аўторак Нямцоў быў пахаваны на Траякураўскіх могілках у расейскай сталіцы.