Рассельгаснагляд мае намер кантраляваць тавары на мяжы Беларусі і ЕЗ

Кіраўнік Рассельгаснагляду звярнуўся да міністра сельскай гаспадаркі і харчавання Беларусі Леаніда Зайца.

Пра гэта сайту charter97.org паведамілі ў прэс-службе расейскага ведамства.

Рассельгаснагляд ужо звяртаўся да беларускага боку з просьбай аб арганізацыі на беларускім адцінку вонкавай мяжы Мытнага саюза, для выяўлення схем незаконных паставак, сумеснага маніторынгу паднагляднай прадукцыі.

«Рэакцыя Мінсельгасхарча Беларусі на гэты зварот была вельмі неадназначнай - яно паведаміла Рассельгаснагляду, што арганізацыя сумеснага маніторынгу паднагляднай прадукцыі на беларускім адцінку вонкавай мяжы Саюза магчымая выключна пры адначасовым ужыванні такіх жа захадаў на казахстанскім і расейскім адцінках вонкавай мяжы Мытнага саюза. Пры гэтым ігнаруецца тая акалічнасць, што праз гэтыя адцінкі, у адрозненне ад беларускага, масавыя патокі кантрабандных грузаў з Еўразвяза не праходзяць», - гаворыцца ў паведамленні.

Ведамства адзначае, што пачынаючы з верасня 2014 года да сёння у рамках маніторынгавых мерапрыемстваў, якія праводзяцца Рассельгаснаглядам, выяўлена ўжо 248 выпадкаў паступлення падкаранціннай прадукцыі агульнай масай амаль пяцбь тысяч тон, якая прыбыла ў суправаджэнні падробленых фітасанітарных сертыфікатаў краіны паходжання, што прайшлі пры гэтым першасны кантроль у Беларусі.

«Калі ў 2014 годзе былі выяўленыя 82 падробленыя сертыфікаты, уключаючы 23 албанскія сертыфікаты, 24 ізраільскія, 19 чылійскіх і 16 турэцкіх, то ўжо ў 2015 годзе Рассельгаснаглядам выяўлена 166 фальшывых сертыфікатаў, у тым ліку 28 туніскіх, 103 турэцкія, 17 сербскіх і 18 македонскіх, пры тым, што беларускі бок паінфармаваны аб сур'ёзнай занепакоенасці Рассельгаснагляду ў сувязі з абарачэннем фальшывых фітасанітарных сертыфікатаў. На жаль, бяздзейнасць кампетэнтнай службы Беларусі прывяла да росту колькасці парушэнняў.

Не прымаюцца беларускім бокам і прапановы Рассельгаснагляду ў выкарыстанні комплексу інфармацыйных сістэм пры ўзаемным гандлі для ўліку ўвозу і кантролю перамяшчэння паднагляднай і падкаранціннай прадукцыі», - гаворыцца ў паведамленні.

Пазіцыя беларускага боку выклікае неразуменне Рассельгаснагляду ў сувязі з тым, што асноўныя праблемы, прынамсі, выяўленне фальсіфікаваных фітасанітарных і ветэрынарных дакументаў, фіксуюцца Рассельгаснаглядам пасля правядзення кантролю такіх дакументаў службовымі асобамі кампетэнтных службаў Беларусі.

«Прымаючы пад увагу ўсе гэтыя абставіны, Сяргей Данкверт прапанаваў Леаніду Зайцу вярнуцца ў магчыма кароткія тэрміны да разгляду пытання аб арганізацыі сумеснага з Рассельгаснаглядам маніторынгу паднагляднай прадукцыі, якая паступае на беларускі адцінак вонкавай мяжы Мытнага саюза», - гаворыцца ў паведамленні.