Іран чакае паставак С-300 у 2015 годзе
1- 14.04.2015, 12:35
- 4,104
Іран разлічвае, што зенітна-ракетныя комплексы С-300 будуць пастаўленыя Расеяй ужо ў гэтым годзе.
Пра гэта заявіў сакратар Рады нацыянальнай бяспекі краіны Алі Шамхані. Ён назваў пытанне паставак "нязначнай тэмай" у двухбаковых кантактах Ірана і Расеі, паведамляе BBC.
"Існуюць велізарныя стратэгічныя магчымасці ў стасунках паміж Расеяй і Іранам. Ліквідаванне гэтай перашкоды як раз будзе спрыяць яшчэ большаму развіццю нашых стасункаў", - растлумачыў ён.
Раней сакратар Савета Бяспекі Расеі Мікалай Патрушаў заявіў, што для паставак комплексаў С-300 Ірану спатрэбіцца час. "Я думаю, мінімум паўгода на тое, каб скончыць працу", - сказаў ён.
У панядзелак прэзідэнт Расеі Уладзімір Пуцін падпісаў указ, які дазваляе перадаць Ірану сістэмы С-300. Занепакоенасць з гэтай нагоды ўжо выказаў дзяржсакратар ЗША Джон Кэры.