Нацбанк падоўжыў прыпыненне ліцэнзіі іранскага «ТК Банка»
- 29.04.2015, 17:38
- 31,834
Нацбанк Беларусі падоўжыў яшчэ на год забарону на асобныя банкаўскія аперацыі для закрытага акцыянернага таварыства «Банк гандлёвы капітал».
Пра гэта charter97.org паведамілі ва ўправе інфармацыі і грамадскіх сувязей Нацыянальнага банка.
Рашэнне аб падаўжэнні прынятай раней пастановы аб прыпыненні дзеяння спецыяльнага дазволу (ліцэнзіі) на вядзенне банкаўскай дзейнасці ў частцы правядзення асобных банкаўскіх аперацый праўленне Нацбанку прыняло сёння. «Пастанова прынятая з улікам вынікаў праверкі ЗАТ «ТК Банк» у сувязі з невыкананнем ім асобных патрабаванняў банкаўскага заканадаўства», - растлумачылі ва ўправе рэгулятара.
ЗАТ «ТК Банк» забаронена прыцягваць грашовыя сродкі фізічных і юрыдычных асоб у ашчаджэнні (дэпазіты); выдаваць банкаўскія гарантыі; весці давернае кіраванне грашовымі сродкамі. Таксама гэта тычыцца выпуску ў абарачэнне банкаўскіх пластыкавых картак; выдачы каштоўных папер, якія пацвярджаюць прыцягненне грашовых сродкаў у ашчаджэнні (дэпазіты) і размяшчэнне іх на рахункі; фінансаванні пад уступку грашовага патрабавання (факторынг). Акрамя таго, для банка ўведзеныя абмежаванні на адкрыццё банкаўскіх рахункаў фізічных і юрыдычных асоб; вядзенне разліковага і касавага абслугоўвання фізічных і юрыдычных асоб, у тым ліку банкаў-карэспандэнтаў, у замежнай валюце.
ЗАТ «Банк гандлёвы капітал» (ТК Банк) створаны ў кастрычніку 2008 года. Асноўным акцыянерам ЗАТ «ТК Банк» з'яўляецца адзін з найбуйнейшых іранскіх банкаў Bank Tejarat з доляй 99,89%.