З Непала эвакуявалі беларусаў
5- 29.04.2015, 20:12
- 20,814
З зоны бедства ў Непале ў Маскву эвакуявалі 128 чалавек, у тым ліку беларусаў.
Два спецрэйсы МНС Расеі даставілі сёння ў Маскву з зоны бедства ў Непале 128 чалавек, у тым ліку 11 дзяцей, паведамілі БелТА ў прэс-службе МНС.
Сярод вывезеных з зоны, пацярпелай ад землятрусу, - грамадзяне Расеі, Казахстана, Беларусі, Украіны, Таджыкістана ды іншых краін. Яны дастаўленыя ў маскоўскі аэрапорт Дамадзедава.
У прэс-службе пасольства Беларусі ў Расеі паведамілі, што МНС загадзя праінфармавала дыппрадстаўніцтва аб тым, што сярод вывезеных з зоны бедства знаходзяцца грамадзяне Беларусі. У сувязі з гэтым супрацоўнікі амбасады выехалі ў аэрапорт Дамадзедава, каб сустрэць суайчыннікаў і надаць ім патрэбную дапамогу. Паводле папярэдняй інфармацыі, з Катманду прыбылі два беларускія грамадзяніны.
Землятрус адбыўся ў Непале 25 красавіка. Паводле апошніх звестак, яго ахвярамі сталі больш за 5 тысяч чалавек.