Віцебскі завод электравымяральных прыбораў перайшоў на трохдзёнку
10- 3.04.2015, 14:51
- 16,178
Праз складаную фінансавую сітуацыю прадпрыемства перайшло на скарочаны працоўны тыдзень.
Пра гэта charter97.org паведамілі работнікі аднаго з цэхаў завода.
«Віцебскі завод электравымяральных прыбораў перайшоў на трохдзёнку, і нідзе няма гэтай інфармацыі. Заробкі 1 200 000 рублёў. Дырэктар пенсіянер пайшоў, і паставілі яго сына. На прадпрыемстве дзеецца нейкі жах, падключыцеся да сітуацыі. Просім ўсім цэхам», - адзначылі рабочыя.
На заводзе адмовіліся каментаваць сітуацыю. Па нумары в.а. дырэктара Яўгена Лядвіна, які пазначаны на сайце, заявілі:
«Я не буду размаўляць з вамі пра гэтае пытанне праз тэлефон».
ААТ «Віцебскі завод электравымяральных прыбораў» - вядучае беларускае прадпрыемства ў галіне распрацоўкі і вытворчасці складаных электравымяральных прыбораў. На заводзе вырабляецца прадукцыя, прызначаная для звычайных і асаблівых умоў эксплуатацыі на цепла- і гідраэлектрастанцыях, на транспарце і ў авіяцыі, на прамысловых прадпрыемствах і ў жылых дамах.
Нагадаем, апошнім часам многія прадпрыемствы пераводзяцца на скарочаны працоўны тыдзень або вымушаюць рабочых пісаць заявы на адпачынкі за свой кошт. Так, толькі за пачатак сакавіка ў рэдакцыю charter97.org паступілі скаргі з такіх прадпрыемстваў як «Гомсельмаш», Асіповіцкі завод аўтамабільных агрэгатаў, Светлагорскі завод жалезабетонных вырабаў, Бабруйскі завод дэталяў і агрэгатаў, «Магілёўтрансмаш», «Строммашына», МТЗ, «Гомельдрэў» , Менскі падшыпнікавы завод, Беларуская чыгунка, ААТ «Віцебскія прадукты» і іншыя.