«Інфляцыйны вал» абрыне заробкі яшчэ на 20%

Упершыню за год не толькі рэальныя, але нават намінальныя даходы беларусаў знізіліся.

Засталіся толькі мары аб абяцаных як тысячы, так і пяцістах далярах. І эканамісты не супакойваюць. Гэта толькі пачатак больш сур'ёзных праблем, паведамляе «Белсат».

Да 2015 года мы павінны наблізіць сумы заробкаў да тысячы даляраў у эквіваленце. На момант гэтага выказвання - падчас Усебеларускага з'езда ў снежні 2010 года - сярэдні заробак па краіне складаў $472 даляра. У жніўні, па сённяшніх звестках Белстата, - на 20% менш. Праўда, інфляцыя ў летнія месяцы была даволі нізкая, таму зніжэнне заробкаў беларусы пакуль адчулі не ў поўнай меры.

«Рэальныя даходы насельніцтва знізіліся амаль на 5%. І яны асабліва рэзка зніжаюцца цяпер, вось даслоўна ў ліпені, жніўні, ну, вы ведаеце, многія буйныя заводы не маюць збыту», - заўважае эканаміст Леанід Злотнікаў.

Апошнія месяцы лета на выплату заробкаў урад выдаў заводам $860 млн даляраў, пазычаных праз выпуск аблігацый. Са слоў эканаміста Леаніда Злотнікава, запуск у эканоміку такой велізарнай сумы грошай, незабяспечаны вытворчасцю, надзьмуў ў эканоміцы нарыў, які павінен лопнуць найбліжэйшым часам.

«Мы бачым, што, сапраўды, інфляцыя наспявае. Яна адаб'ецца пасля выбараў. Кошты на аптовых рынках павялічыліся за 7 месяцаў на 129%, а кошты рознічнага рынку - толькі на 107%. Так не бывае. Доўга не ўтрымаеш такі відэлец, рознічныя кошты выраўнуюцца з аптовымі. Таму навіс такі інфляцыйны вал», - працягвае Леанід Злотнікаў.

Іншымі словамі, паказаны інфляцыйны вал пагражае абрынуць рэальныя даходы насельніцтва пасля «выбараў» яшчэ на 20%. Зыходзячы з досведу, урад, імаверна, паспрабуе затрымаць гэты працэс яшчэ на некалькі месяцаў - у чаканні чарговага сусветнага катаклізму, каб ускласці адказнасць за падзенне даходаў на яго.