У дэкрэт аб «дармаедах» унясуць змены

Спіс катэгорый грамадзян, якія не будуць лічыцца «дармаедамі», плануюць пашырыць.

Нормы дэкрэта прэзідэнта «Аб папярэджанні сацыяльнага ўтрыманства» павінны быць адкарэктаваныя да канца 2016 года. Такая пастанова прынятая на нарадзе ў Аляксандра Лукашэнкі.

Як паведамляе прэс-служба кіраўніка, плануецца пашырыць пералік катэгорый грамадзян, якія будуць вызваляцца ад выплаты збору. У іх лік, напрыклад, увойдуць тыя, хто праходзіць альтэрнатыўную службу, а таксама спаротоўцы, якія знаходзяцца ў спісачным складзе нацыянальнай або зборнай каманды Беларусі па таму або іншаму віду спорту і не атрымліваюць нейкага даходу.

«Акрамя таго, падтрымана прапанова ў якасці выплачанага падаходнага падатку з фізічных асоб улічваць сумы такога падатку, на якія ён быў паменшаны ў выніку прымянення ўстаноўленых заканадаўствам падатковых вылікаў, як, напрыклад, у выпадку аказання дзяржаўнай сацыяльнай падтрымкі падчас будаўніцтва жылля або атрымання адукацыі», — паведамляе прэс-служба.

Яшчэ адно змяненне закране перанос тэрмінаў выдачы паведамленняў і выплаты збору за 2015 год на 20 студзеня і 20 лютага 2017 года адпаведна. «Гэта зроблена ў тым ліку з улікам неабходнасці ўдасканалення сфармаванай інфармацыйнай базы звестак плацельшчыкаў збору», — адзначаецца ў паведамленні.

Чакаецца, што мясцовыя органы ўлады будуць надзелены правам вызваляць грамадзян ад выплаты збору, якія трапілі ў цяжкія жыццёвыя сітуацыі.