10 прадпрыемстваў сфармавалі траціну менскага бюджэту
9- 7.12.2016, 9:08
- 17,540
Больш за 30% бюджэту беларускай сталіцы было сфармавана дзесяццю буйнымі арганізацыямі.
Імі выплачана ў бюджэт 2,5 млрд. рублёў, або 112,2% да ўзроўню дзесяці месяцаў 2015 года, паведамляе прэс-служба Міністэрства падаткаў і збораў.
На 1 лістапада 2016 года фарміраванне кансалідаванага бюджэту горада забяспечылі блізу 344 тыс. плацельшчыкаў, у тым ліку 59 тыс. арганізацый, 71 тыс. індывідуальных прадпрымальнікаў і 214 тыс. фізічных асоб.
У рэйтынгу найбуйнейшых плацельшчыкаў сталіцы — ААТ «Газпрам трансгаз Беларусь», ЗТАА «Лукойл Беларусь», ТАА «Тытунь-інвест», РУП «Мінскэнэрга», ЗАТ «Менскі завод вінаградных він», унітарнае прадпрыемства «Велком», ЗТАА «Газпрамнафта-Белнафтапрадукт», ЗАТ «Беларуская нафтавая кампанія», СТАА «Мабільныя Тэлесістэмы», ААТ «Менск Крышталь» — кіруючая кампанія холдынгу «Менск Крышталь груп».
Агулам, паводле звестак МПЗ, амаль 70% бюджэту Менска за дзесяць месяцаў 2016 года забяспечана недзяржаўным сектарам эканомікі.
У параўнанні з такім жа перыядам 2015 года паступленні ад вышэйназваных суб'ектаў узраслі на 0,3 млрд. рублёў, або на 6,4%.
У разліку на адну недзяржаўную арганізацыю паступленні павялічыліся на 6,2%, або на 5,8 тыс. рублёў.