Халадовіч здабыла «бронзу» на этапе «Брыльянтавай лігі» ў Швэйцарыі

Гэта першы сур'ёзны турнір беларускай спартоўкі пасля Рыа-2016.

Беларуска Таццяна Халадовіч заняла трэцяе месца ў кіданні дзіды на этапе «Брыльянтавай лігі» ў Лазане, паведамляе БелТА.

Для аднаго з лідараў беларускай каманды старт у Швэйцарыі стаў першым сур'ёзным турнірам пасля Алімпійскіх гульняў у Рыа, дзе Таццяна Халадовіч заняла пятае месца.

У Лазане беларуска ў найлепшай сваёй спробе адправіла снарад на 64 м 15 см. Перамагла ў спаборніцтвах у кіданні дзіды ў жанчын Мадара Паламейка з Латвіі - 65 м 29 см. Другое месца заняла тытулаваная Барбора Шпатакава з Чэхіі - 64 м 48 см.

У гэтым сезоне гэта не першы поспех Таццяны Халадовіч, у ліпені яна была пераможцай этапу «Брыльянтавай лігі» ў Манака і чэмпіянату Еўропы ў Амстэрдаме.