Дэвід Крэмер: «Ніякіх паблажак, пакуль не вызваляць усіх палітвязняў»
2- 25.01.2008, 9:10
Намеснік памочніка Дзяржсакратара ЗША Дэвід Крэмер прывітаў вызваленне ў Беларусі палітвязняў Змітра Дашкевіча і Міколы Аўтуховіча і заклікаў беларускія ўлады вызваліць з турмаў усіх Вязняў сумлення.
«Мы вітаем вызваленне ў Беларусі палітвязняў Міколы Аўтуховіча і Змітра Дашкевіча. Гэта, безумоўна, пазітыўны момант, але, з іншага боку, мы бачым, што ў Беларусі арыштоўваюць удзельнікаў акцый прадпрымальнікаў і аказваюць грубы ціск на лідэраў апазіцыі. Такія дзеянні павінны спыніцца. Ніводная краіна не павінна рабіць беларускім уладам ніякіх паблажак, пакуль не будуць вызваленыя ўсе палітвязні», – заявіў Дэвід Крэмер падчас сустрэчы з беларускімі журналістамі ў Вашынгтоне.
Па словах намесніка памочніка Дзяржсакратара ЗША, за вызваленнем Дашкевіча і Аўтуховіча павінна быць вызваленне астатніх дэмакратаў.
«Я спадзяюся, што мы ўбачым працяг гэтага працэсу. Гэта ўсяго толькі першы крок, а не канчатковы вынік. Мы ходзім, каб грамадзяне Беларусі мелі магчымасць вылучыць свабоднае жыццё, яны заслугоўваюць права выбару. Гэтаксама як і прадпрымальнікі, якім не падабаюцца ўказы або загады ўлад. Яны маюць права выйсці на дэманстрацыю пратэсту», – заявіў Дэвід Крэмер.
Адказваючы на пытанне карэспандэнта прэс-цэнтра Хартыі’97, як улады ЗША маюць намер рэагаваць на далейшыя парушэнні ўладамі Беларусі правоў чалавека, Дэвід Крэмер адказаў:
«У красавіку гэтага года я сустракаўся з намеснікам кіраўніка адміністрацыі прэзідэнта Наталляй Пяткевіч. Я тлумачыў: калі дзяржава не зробіць крокаў у бок дэмакратызацыі, пачынаючы з вызвалення ўсіх палітычных зняволеных, то Злучаныя Штаты ўвядуць дадатковыя санкцыі супраць рэжыму. Акрамя таго, я казаў, што калі ўрад Беларусі распачне правільныя крокі, Амерыка адрэагуе належным чынам.
На жаль, як вам вядома, у 2007 годзе ўрад Беларусі нічога не зрабіў. Таму мы былі змушаныя зрабіць дзве рэчы: мы пашырылі спіс людзей, якія трапляюць пад візавую забарону, і ў пацверджанне сур'ёзнасці нашых намераў увялі санкцыі супраць «Белнафтахіма». Гэта сапраўды была тая санкцыя, якая прымусіла звярнуць на яе ўвагу беларускае кіраўніцтва, і рабілася яна менавіта з гэтай мэтай – паказаць беларускім уладам, што падыход ЗША да пытання свабодаў і правоў чалавека ў Беларусі вельмі і вельмі сур'ёзны».
Каментуючы прэс-цэнтру Хартыі’97 пагрозы Аляксандра Лукашэнкі ў адрас амбасадара ЗША ў Менску і яго слова аб верагоднасці высылання дыпламату з краіны, амерыканскі палітык адзначыў:
«Калі я даведаўся, што Лукашэнка казаў у адрас амбасадара ЗША, у мяне стварылася ўражанне, што ён проста сарваўся. Гэта не той каментар, які ён планаваў загадзя. Гэта была нечаканасць, якая выяўляла яго незадаволенасць і збітасць з толку. Я тады зразумеў, што мы сапраўды прыцягнулі ўвагу Лукашэнкі, таму што, як вы памятаеце, я казаў пра магчымасць далейшых санкцый. Па меры таго як Расея будзе падвышаць цэны на энерганосьбіты, эканамічная сітуацыя ў Беларусі будзе пагаршацца і, магчыма, краіна ўжо не зможа сабе дазволіць дадатковых эканамічных санкцый».
