Сёння – 37-ы Дзень беларускай салідарнасці (Фота)

16.10.2008, 8:48

Сёння спаўняецца тры гады, як у Беларусі сталі праходзіць акцыі салідарнасці з сем'ямі выкрадзеных і рэпрэсаваных актывістаў беларускай апазіцыі. Акцыі салідарнасці сёння традыцыйна правядуць у Менску і шматлікіх гарадах Беларусі актывісты грамадзянскай кампаніі «Еўрапейская Беларусь», моладзевых ініцыятыў «Джынс за Свабоду», «Малады Фронт», «Маладая Беларусь», апазіцыйныя палітычныя партыі.

У Менску, у рэгіёнах, за мяжой людзі вось ужо тры гады выходзяць на плошчы сваіх гарадоў і заклікаюць беларускія ўлады спыніць рэпрэсіі супраць апазіцыі і пачаць у краіне палітычныя рэформы. Напрыклад, сёння ў Салігорску, на плошчу зноў выйдуць людзі з партрэтамі палітвязняў і зніклых.

«На гэтых акцыя мы дамагаемся вызвалення палітвязняў і рэабілітацыі былых вязняў сумлення і перакананыя, што асуджаных на «Працэсе-14» актывістаў апазіцыі трэба лічыць палітвязнямі, таму што абмежаванне волі таксама адзін з элементаў ціску і форма палітычнага пераследу», -- паведаміў «Радыя Свабода» лідэр салігорскага «Маладога Фронта» Іван Шыла.

«На цэнтральную плошчу Менска выйдуць дзясяткі беларусаў, можа нават сотні для таго, каб у чарговы раз ушанаваць памяць людзей, якія зніклі ці церпяць за свае перакананні. Некаторыя з іх былі змушаныя з'ехаць за мяжу з-за таго, што ім не даюць магчымасці жыць у роднай краіне. Мы паспрабуем паказаць усім беларусам, што лёс гэтых людзей для нас не абыякавы, што мы іх памятаем, што мы гатовыя за іх змагацца», -- заявіў лідэр новай арганізацыі «Маладая Беларусь» Артур Фінькевіч.

Вулічныя акцыі салідарнасці, канферэнцыі, выставы, прэзентацыі фільмаў, прысвечаныя Беларусі, пройдуць 16 кастрычніка ў шматлікіх краінах свету – Польшчы, Украіне, Літве, Расеі, Францыі, Германіі, Бельгіі, Нідэрландах, Чэхіі, ЗША. Так, беларускія студэнты ў Польшчы збяруцца каля будынка беларускай амбасады, запаляць свечкі і паставяць каля іх партрэты скрадзеных апанентаў рэжыма Лукашэнкі. У Эстоніі, Літве і Латвіі беларускія студэнты будуць распаўсюджваць інфармацыйныя матэрыялы аб сітуацыі ў Беларусі.

Нагадаем, што два месяцы таму з турмаў былі вызваленыя палітвязні экс-кандыдат у прэзідэнты Беларусі Аляксандр Казулін, моладзевы актывіст Андрэй Кім, лідэр прадпрымальнікаў Сяргей Парсюкевіч.

Але на гэтым спіс палітвязняў не скончваецца. За ўдзел у акцыях пратэсту прадпрымальнікаў 10 актывістаў апазіцыі -- Аляксей Бондар, Арцём Дубскі, Міхаіл Крываў, Міхаіл Пашкевіч, Аляксандр Стральцоў, Аляксандр Чарнышоў, Таццяна Цішкевіч, Міхаіл Субач і Павел Вінаградаў прысуджаныя да абмежавання волі на 2 гады без накіравання для адбыцця тэрміна ў адмысловыя ўстановы. Максім Дашук, як непаўнагадовы, прысуджаны да палутара год абмежавання волі.

Ініцыятарамі Дзён беларускай салідарнасці тры гады таму сталі лідэр ініцыятывы «Мы памятаем», удава зніклага ў Беларусі бізнэсмэна і грамадскага дзеяча Ірына Красовская, вядомая журналістка Ірына Халіп і моладзевы лідэр Мікіта Сасім. Ідэя праводзіць Дні салідарнасці нарадзілася пасля таго, як 16 верасня 2005 года, ва ўгодкі знікнення віцэ-спікера Вярхоўнага Савета 13 склікання Віктара Ганчара і бізнэсмэна, грамадскага дзеяча Анатоля Красоўскага, міліцыя разагнала акцыю ў памяць аб зніклых і адабрала ў яе ўдзельнікаў партрэты зніклых палітыкаў (людзі трымалі ў руках таксама партрэты выкрадзеных у Беларусі экс-міністра ўнутраных справаў Юрыя Захаранкі і журналіста Зміцера Завадскага) і нацыянальныя сцягі. У той дзень моладзевы лідэр Мікіта Сасім падняў над галавой сваю джынсавую кашулю як знак супраціўлення дыктатуры.