Адвакат Гарачка: «Рашэнне суду дадасць Зэльцэру праблем са здароўем»
- 31.10.2008, 12:10
«Думаю, што сённяшняе рашэнне суду дадасць Эмануілу Зэльцэру праблем са здароўем», — заявіў журналістам адвакат Зміцер Гарачка, каментуючы рашэнне Вярхоўнага суду Беларусі.
Сёння Вярхоўны суд разгледзеў касацыйную скаргу на прысуд Менскага гарадскога суду і пакінуў яго ў сіле. 11 жніўня Э.Зэльцэр быў прысуджаны да трох год пазбаўлення волі нібыта за выкарыстанне загадзя ілжывых дакументаў і замах на камерцыйны шпіянаж.
Адвакат падкрэсліў, што Зэльцэр цяпер знаходзіцца ў цяжкім фізічным стане, паведамляе БелаПАН.
«І Эмануіл Зэльцэр, і Ўладлена Функ разлічвалі, што Вярхоўны суд прыме рашэнне на іх карысць. Мой кліент па-ранейшаму настойвае, што злачынствы ён не здзяйсняў, ён лічыць прысуд несправядлівым і незаконным», — сказаў З.Гарачка.
Адразу з будынка суда адвакат накіраваўся на сустрэчу са сваім кліентам, які ўтрымліваецца ў ізалятары КДБ. З.Гарачка таксама паведаміў, што, хутчэй за ўсё, Э.Зэльцэр будзе адбываць пакаранне ў той жа калоніі, што і былы палітвязень Аляксандр Казулін (віцебскай калоніі «Віцьба-3»).
