Роднасныя душы (Фота)

Дзейсны старшыня АБСЕ, міністр замежных справаў Фінляндыі Аляксандр Стуб, судзячы па ягоных заявах падчас візіту ў Менск, знаходзіцца ў захапленні ад сустрэчы з дыктатарам Лукашэнкам і ягоным міністрам замежных справаў Мартынавым. Стуб заўважыў шмат пазітыўнага ў Беларусі. Мабыць, фальсіфікацыя «выбараў» і наяўнасць папярэдняга спісу чальцоў «парламента» -- для яго «рух у правільным напрамку».

Звальненне з працы дэмакратычных кандыдатаў у дэпутаты «парламента» і чальцоў іх ініцыятыўных груп -- гэта «пазітыўная змена».

Адсутнасць дэмакратычных прадстаўнікоў ва ўчастковых выбарчых камісіях – «рух наперад».

Перашкода назіранню за падлікам галасоў назіральнікам АБСЕ – «першыя крокі ў правільным напрамку».

Арышты і збіццё ўдзельнікаў кампаніі «Байкот» – «вызначанае паляпшэнне».

Дзейсны старшыня АБСЕ змог убачыць у Беларусі тое, што не змаглі ўбачыць самі беларусы і не заўважылі назіральнікі БДІПЧ АБСЕ, якія прызналі «парламенцкія выбары», якія адбыліся, несвабоднымі і недэмакратычнымі. Але гэта не дзіўна, таму што вы самі можаце пераканацца, што Аляксандр Стуб і Аляксандр Лукашэнка проста роднасныя душы.