З сённяшняга дня таксі ў Менску падаражэла на 20 %

Большасць аператараў паслугаў легкавых таксі ў Менску зарэгістравалі новыя тарыфы.

Аб гэтым паведаміў БелаПАН начальнік упраўлення коштавай палітыкі камітэта эканомікі Менгарвыканкама Іосіф Рачыцкі.

Паводле яго інфармацыі, у асноўнай масе аператары зарэгістравалі падвышэнне тарыфаў у сярэднім на 20%.

Ён паведаміў, што "кошты на паслугі таксі змяняюцца не адначасова, не з пэўнай даты. Змяненне тарыфаў пачатае з сярэдзіны кастрычніка".

Як раней паведаміў БелаПАН дырэктар асацыяцыі "Сталічнае таксі" Канстанцін Кузьмянкоў, жаданне таксістаў падвысіць тарыфы звязанае з ростам коштаў на гаруча-змазачныя матэрыялы і запасныя часткі. Ён адзначыў, што новыя тарыфы на таксі можна даведацца у дыспетчарскіх службах фірмаў-аператараў.

У службах таксі "107" і "135" БелаПАН паведамілі, што падвышэнне тарыфу чакаецца з 10 лістапада і ён складзе 1.580 рублёў за кіламетр.

У службе таксі "161" дату падвышэння тарыфу пакуль не назвалі.

Апошняе падвышэнне тарыфу на праезд у таксі было 5 лістапада 2007 года. Тады праезд падаражэў на 20%. Тарыф з гэтага перыяду складаў 1.320 рублёў за адзін кіламетр.

У асацыяцыю "Сталічнае таксі" уваходзяць 20 аператараў, якія аказваюць паслугі таксі ў Менску. У горадзе працуе каля 3,5 тыс. таксі.

Як паведамлялася раней, 5 лістапада падвышаныя лімітныя тарыфы на паслугі маршрутных таксі ў Менску ў сярэднім на 20%.