Лукашэнка ўвёў новы парадак дзяржаўных закупак

У Беларусі ўводзіцца новы парадак дзяржаўных закупак. Адпаведны ўказ №618 «Аб дзяржаўных закупках у Рэспубліцы Беларусь» Аляксандр Лукашэнка падпісаў 17 лістапада.

Дакументам замацаваныя ключавыя прынцыпы рэгулявання ў галіне дзяржаўных закупак: забеспячэнне максімальнай эфектыўнасці выдаткоўвання бюджэтных сродкаў, галоснасці і празрыстасці закупнога працэсу, добрасумленнай канкурэнцыі сярод патэнцыйных пастаўшчыкоў, а таксама дэбюракратызацыя і спрашчэнне закупнога працэсу, паведамляе БелТА.

У мэтах прадастаўлення большай самастойнасці і падвышэння адказнасці прыняцце рашэнняў па пытаннях дзяржаўных закупак прадстаўлена кіраўнікам дзяржаўных органаў і саміх закупаючых арганізацый. Адмяняецца шматступенная працэдура ўзгадненняў з рознага ўзроўня дзяржаўнымі органамі.

Пры гэтым ліквідуецца інстытут міжведамасных камісій, экспертных саветаў, якія ўдзельнічалі ў прыняцці такіх рашэнняў, адмяняецца неабходнасць узгаднення прыманых рашэнняў з вышэйстаячымі дзяржаўнымі органамі.

З улікам назапашанага досведу правядзення працэдур закупак ва ўказе ўдакладняецца паняцце дзяржаўных закупак, захоўваецца магчымасць іх цэнтралізацыі, вызначаюцца прынцыпы яе ажыццяўлення.

Дакументам вызначаны пералік відаў працэдур дзяржаўных закупак. Гэта конкурс (адкрыты, закрыты, якія могуць быць двухэтапнымі), працэдура запыту коштавых прапановаў, працэдура афармлення канкурэнтнага аркуша, а таксама як альтэрнатыва паказаным працэдурам працэдура закупкі з адной крыніцы.

Адкарэктаваны таксама пералік тавараў (прац, паслуг), пры набыцці якіх працэдуры конкурснай сістэмы закупак не ўжываюцца.

Асобныя дзяржаўныя органы надзяляюцца дадатковымі паўнамоцтвамі. Так, на Міністэрства фінансаў ускладаецца абавязак вядзення рэгістрацыі дамоваў аб дзяржаўных закупках, Нацыянальнаму статыстычнаму камітэту даручаецца вядзенне адзінай статыстычнай справаздачнасці па пытаннях дзяржаўных закупак.

Акрамя таго, усталёўваецца адказнасць у адносінах службовых асоб усіх узроўняў, якія ўдзельнічаюць у працэдурах закупак: кіраўнікоў дзяржаўных органаў (арганізацый) - персанальная, аж да вызвалення ад займанай пасады, за незабеспячэнне патрабаванняў заканадаўства аб дзяржаўных закупках; старшыняў і сябраў камісій, створаных для правядзення конкурсаў (іншых відаў працэдур закупак), іншых спецыялістаў заказчыка, што ўдзельнічаюць падчас ажыццяўлення дзяржаўных закупак, - дысцыплінарная, адміністрацыйная, крымінальная і (або) іншая за парушэнне правілаў у сферы дзяржаўных закупак, што здзейснілі шкоду дзяржаве, арганізацыям або грамадзянам.

Дакумент уступае ў сілу праз два месяцы пасля яго афіцыйнага апублікавання, за выключэннем некаторых пунктаў. Калі працэдуры закупак пачатыя або дамовы на пастаўку тавараў (выкананне прац, аказанне паслуг) складзеныя да ўступлення ў сілу ўказу, то дзяржзакупкі тавараў (прац, паслуг) завяршаюцца па ранейшым заканадаўстве.