Амбасада ЗША перадала Зельцэру ў турму лекі
2- 20.11.2008, 16:19
19 лістапада прадстаўнікі амбасады ЗША змаглі наведаць амерыканскага грамадзяніна Эмануіла Зельцэра, які знаходзіцца ў калоніі № 15 Магілёва, і перадаць неабходныя яму лекі.
Упершыню амерыканскім дыпламатам дазволілі сустрэцца з турэмнай лекаркай, якая адказвае за здароўе Э.Зельцэра. Яна падцвердзіла, што ў асуджанага высокі артэрыяльны ціск і выказала свой пункт гледжання на стан яго здароўя, паведамілі БелаПАН у прэс-службе амерыканскай дыпмісіі.
Э.Зельцэр, этапаваны ў калонію № 11 Магілёва для адбыцця пакарання, пасля прыбыцця быў накіраваны ў турэмны шпіталь. Прадстаўнікам амбасады ЗША ён скардзіўся на сталыя моцныя болі, нерэгулярнае атрыманне неабходных яму лекаў і вельмі высокі артэрыяльны ціск.
Дыпмісія ЗША спадзяецца атрымаць дазвол беларускіх уладаў на паўторны агляд амерыканскага грамадзяніна незалежным лекарам.
Амерыканская амбасада працягне аказваць Э.Зельцэру консульскую падтрымку і настойваць на яго вызваленні з меркаванняў гуманнасці.
Э.Зельцэр і Уладлена Функ былі затрыманыя ў Менску 12 сакавіка 2008 года. 11 жніўня Менскі гарадскі суд прысудзіў Э.Зельцэра да трох гадоў пазбаўлення волі за выкарыстанне загадзя ілжывых дакументаў і замах на камерцыйны шпіянаж. Яго сакратарка была прысуджаная да аднаго году пазбаўлення волі. 31 кастрычніка Вярхоўны суд пакінуў гэты прысуд у сіле. Усе судовыя працэсы па гэтай справе праходзілі ў зачыненым рэжыме.
16 лістапада Функ была этапаваная ў выпраўленчую калонію ў Гомелі.
Абарона не плануе звяртацца да Аляксандра Лукашэнкі з просьбай аб памілаванні, паколькі асуджаныя не прызнаюць сваю віну.
