Спецлужбы сарвалі святкаваньне гадавіны Слуцкага збройнага чына

Ад гаспадара менскага клюбу, дзе меркавалася адзначыць гадавіну гістарычнай падзеі, супрацоўнікі спэцслужбаў запатрабавалі скасаваць дамову аб арэндзе залі.

“Мы зьбіраліся правесьці закрытую, але прадстаўнічую вечарыну, прысьвечаную Слуцкаму паўстаньню 1920 года. Дамовіліся з клюбам, нават заплацілі частку грошай за арэнду. На гаспадара клюбу ў чацьвер выйшлі супрацоўнікі спэцслужбаў і рэкамэндавалі яму, каб ён адмовіўся ад супрацоўніцтва з намі. Мы пайшлі ў аддзел культуры Ленінскага райвыканкаму і, здавалася, усё ўладзілі. І вось сёньня нам паведамілі з клюбу, што да іх зноў прыходзілі й патрабавалі скасаваць дамову”, — распавёў «Радыё Свабода» адзін з арганізатараў, прыхільнік руху “За Свабоду” Юрась Карэтнікаў.

На вечарыну было запрошана каля сотні гасьцей — дэмакратычных актывістаў з розных рэгіёнаў Беларусі. Меліся выступіць бард Аляксандр Мельнікаў, гурт “Паўночны воўк” зь Віцебску, а таксама маладыя музыкі са Слуцку і Менску.