Экс-кіраўнік Нацбанка: Беларусь на мяжы згубы золатавалютных рэзерваў

Былы кіраўнік Нацыянальнага банка Станіслаў Багданкевіч лічыць, што банкаўская сістэма Беларусі сёння нагадвае «бурбалку, якая можа лопнуць». Аб гэтым ён заявіў 11 снежня на прэс-канферэнцыі ў Менску.

«Сёння рэзервы ў нас толькі 3 млрд. даляраў. Мы 1 млрд. даляраў «з'елі» літаральна за апошні месяц», — заявіў экс-кіраўнік Нацбанка.

Па ягоным меркаванні, калі золатавалютныя запасы будуць скарачацца такімі тэмпамі, то хутка іх у краіны наогул не застанецца.

Выхад з сітуацыі, якая склалася, экс-кіраўнік Нацбанка бачыць у «павольнай дэвальвацыі» беларускай нацыянальнай валюты на 20-30% на працягу 2009 года, а таксама рашэнне праблемы дэфіцыту гандлёвага балансу.

Паводле дадзеных Нацбанка, міжнародныя рэзервныя актывы Беларусі, разлічаныя па стандартах МВФ, на 1 снежня 2008 года склалі 3 млрд. 775 млн. даляраў ЗША, скараціўшыся за лістапад на 276,8 млн. даляраў. Аднак Нацбанк не раскрывае інфармацыю, ці ўключаны ў гэтую статыстыку 1 млрд. даляраў атрыманага ў лістападзе расейскага крэдыту. Калі ён таксама адлюстраваны ў гэтых дадзеных, то скарачэнне золатавалютных запасаў краіны складае 1 млрд. 276 млн. даляраў.

Скарачэнне золатавалютных рэзерваў Беларусі адзначаецца на працягу чатырох месяцаў — на 68,1 млн. даляраў ЗША у кастрычніку, на 459,7 млн. даляраў у верасні і на 44,6 млн. даляраў у жніўні.