Колькі кожны з нас заплаціць за суботнік?
17- 18.04.2008, 11:23
На некаторых прадпрыемствах людзі і лішні дзень адпрацуюць, і частку заробку страцяць.
- Плануецца, што ўдзел у суботніку возьмуць больш за 5 мільёнаў грамадзян Беларусі - такой колькасці ўдзельнікаў яшчэ не было! - заявіў намеснік прэм'ер-міністра Беларусі Аляксандр Касінец.
І дадаў, што ўрад разлічвае сабраць значна больш сродкаў, чым летась. Лічба не называлася, але падлікі паказваюць - калі летась 3,6 мільёнаў удзельнікаў сабралі 11,3 мільярдаў рублёў, то сёлета 5 мільёнаў мусяць сабраць як мінімум 15 мільярдаў, піша "КП в Беларуси".
Мэта суботніка - "зарабіць усёй краінай" на 14 рэанімабіляў і медыцынскую тэхніку для дзяцей. Справа добрая, але адкуль нашыя працадаўцы возьмуць грошы, каб пералічыць іх у фонд суботніка?
- З заробнага фонду, - растлумачыў нам бухгалтар аднаго з дзяржпрадпрыемстваў. - У гэтым месяцы 22 працоўных дні. Нашы супрацоўнікі з суботнікам адпрацуюць 23 дні. А атрымаюць у выніку за 21 працоўны дзень. Таму што заробны фонд той самы, а адлічыць у фонд суботніка давядзецца кошт аднаго працоўнага дня. (Пры акладзе ў 700 тысяч адзін дзень каштуе 32 тысячы. - Рэд.)
Менш стратным будзе суботнік для супрацоўнікаў тых камерцыйных структур, якія маюць прыбытак.
