Беларускую ўласнасць прададуць арабскім шэйхам?

Нядаўна Аляксандр Лукашэнка заявіў, што неўзабаве беларускі рынак можа стаць меней дасяжным для еўрапейскіх інвестараў, паколькі Беларусь знаходзіцца "перад умяшаннем" усходняга капіталу.

Дык калі чакаць беларусам умяшання ўсходняга капіталу і ці трэба ім гэта, каментуюць эксперты "Завтра твоей страны".

-- Агулам кажучы, беларусы могуць застацца ў дурнях, таму што Беларусі трэба размеркаваць у найбліжэйшыя 5-7 гадоў уласнасць на 130 мільярдаў даляраў, -- сцвярджае кіраўнік Аналітычнага цэнтра "Стратэгія" Леанід Заіка. - Цяпер гэтую ўласнасць можна купіць за 20 тысяч даляраў, а праз 4-5 гадоў з гэтага атрымаецца мільён, гэта значыць капіталізацыя можа ўзняцца ў 10, 20 ці нават у 50 разоў, калі зыходзіць з расейскага досведу. Так што цалкам лагічна, што ва ўсходніх інвестараў можа паўстаць жаданне адхапіць шматок беларускай уласнасці. Бо ў Расеі, Украіне, Славаччыне ўжо ўсё расхапалі. А на гэтым кавалку сядзіць Аляксандр Рыгоравіч і кажа пра ўмяшанне ўсходніх інвестараў.

На думку эканаміста, лепш аддаць гэтую ўласнасць сваім грамадзянам, якія на яе шмат гадоў працавалі і стварылі ўсё, што ёсць у Беларусі.

-- Прадпрыемствы, заводы, фабрыкі, трубы -- усё гэта створана людзьмі, якія працавалі ў 1970-80-х гадах, -- лічыць аналітык. – Цяпер яны пенсіянеры, атрымліваюць 180 даляраў і ім прапаноўваюць толькі паназіраць, як фактычна іх уласнасць будуць забіраць. Што з гэтага вынікае? Альбо ва ўладзе - дурні, якія будуць прадаваць і раздаваць гэтую ўласнасць арабам, а насельніцтва застанецца ў якасці наймітаў, альбо ўсё ж такі беларускае кіраўніцтва зладзіць рэферэндум і ўвядзе законы на карысць самім беларусам.

Леанід Заіка прапаноўвае прадаваць уласнасць, перадусім, сваім грамадзянам, а ўсю выручку (або прынамсі 80% ад яе), атрыманую ад гэтага продажу, скіраваць у пенсійны фонд.

-- Такі пенсійны фонд мог бы быць створаны як аснова той уласнасці, якая была створана грамадзянамі Беларусі, -- мяркуе кіраўнік "Стратэгіі". Ён не лічыць, што краіне патрэбны непальскія, сірыйскія альбо эмірацкія капіталісты, да якіх беларусам давядзецца наймацца на працу.

-- Трэба ад пачатку зразумець, хто перад чым стаіць, таму што ад такіх выказванняў складваецца ўражанне, што ўсё 24 тысячы арабскіх шэйхаў устаюць у чэргі і хочуць укласці сюды свае рэсурсы, - кажа кіраўнік Даследчага цэнтра Мізэса Яраслаў Раманчук. - Гэта ўсё "разводкі" чалавека, які хацеў бы надбіць сабе кошт. Арабскія, кітайскія і індыйскія прадпрымальнікі даўно працуюць па цвёрдых правілах, прынятым у свеце. Лукашэнка разумее, што арабскі капітал не мадэрнізуе эканоміку, каб яна была канкурэнтнай на тых рынках, на якія ён імкнецца. Так што яго заявы -- гэтыя стандартныя паводзіны чалавека, які хацеў бы прадаць як даражэй, хацеў бы, каб былі прыбраны выказаныя Еўразвязам патрабаванні.

Яраслаў Раманчук нагадвае, што год таму падчас візіту беларускага прэзідэнта ў Аб'яднаныя Арабскія Эміраты Беларусі абяцалі пабудаваць Абу-Дабі. Ладзіліся візіты і ў іншыя краіны.

-- Але нават з Кітаем, сяброўства з якім мы дэкларуем даволі даўно, адмысловых камерцыйных сувязяў, сумесных праектаў, якімі можна было б пахваліцца, няма, -- адзначае эксперт "Завтра твоей страны". -- Таму, я мяркую, гэта пэўны картачны блеф, пра які ведаюць усе, хто гуляе ў такія гульні.