Бясчынствы расейскіх вайскоўцаў у Грузіі (Відэа)
22- 15.08.2008, 11:32
Расейскія жаўнеры ў парушэнне дамоўленасцяў працягваюць знаходзіцца ў Горы, Поці і Зугдзідзі. Пры гэтым жаўнеры паводзяць сябе агрэсыўна ў дачыненні да мясцовага насельніцтва і журналістаў.
На ўездзе ў Горы расейскія вайскоўцы сумесна з асяцінскім апалчэннем усталявалі кантрольна-прапускныя пункты. Яны страляюць нават па журналістах.
Учора асяцінскія жаўнеры канфіскавалі камеру ў журналістаў грузінскага тэлеканала «Руставі-2». Адзін з журналістаў атрымаў раненне ў руку, перадае тэлеканал «Еўраньюс».
Раней паведамлялася, што расейскія падпадзяленні маюць намер перадаць кантроль над горадам грузінскай паліцыі, якая сюды вярнулася, і канчаткова пакінуць яго ў бліжэйшыя двое сутак.
Але ў звязі з уводам у Горы дадатковай расейскай вайсковай тэхнікі і жаўнераў, супрацоўнікі грузінскай паліцыі ўчора пакінулі горад. Аб гэтым журналістам ИТАР-ТАСС паведамілі прадстаўнікі МУС Грузіі.
Па іхняму сцвярджэнню, той факт, што “расейскі бок увёў ў Горы новую вайсковую тэхніку, з'яўляецца парушэннем дасягнутых дамоўленасцяў”. Расейскае камандаванне тлумачыць неабходнасць заставацца ў Горы тым, што там выяўлены “велізарны арсенал”.
Незразумелай застаецца сытуацыя і ў іншых гарадох Грузіі. Журналіст агенцтва “Асашыэйтэд Прэс” зняў расейскія войскі ў партовым горадзе Поці.
Некалькі дзясяткаў бронемашынаў пяхоты і танкаў бачыў рэпарцёр агенцтва «Рэйтэр» у Зугдзідзі.
Прапаноўваем відэасюжэт, падрыхтаваны «Еўраньюс», у якім адлюстравана раненне журналіста тэлеканала «Руставі-2» асяцінскім апалчэнцам.
