Грамадзяніна ЗША Зэльцэра пазбавілі ў турме КДБ неабходных лекаў

Амерыканскаму грамадзяніну Эмануілу Зэльцэру не аддаюць лекі, перададзеныя для яго прадстаўнікамі амбасады ЗША.

Аб гэтым БелаПАН паведаміў ягоны адвакат Зміцер Гарачка. Ён нагадаў, што яшчэ 18 жніўня ў ізалятары КДБ Э.Зэльцэра наведалі супрацоўнікі амерыканскай дыпмісіі. Яны перадалі кіраўніцтву ізалятара лекаў, прапісаныя амерыканскаму грамадзяніну ягоным лекарам і дастаўленыя з ЗША. "Ужо больш за тыдзень гэтыя лекі не перадаюць Зэльцэру", — сказаў З.Гарачка..

З.Гарачка таксама паведаміў, што да канца тыдня можа быць прызначаная дата разгляду ў Вярхоўным судзе скаргі на прысуд яго падабаронным Эмануілу Зэльцэру і Ўладлене Функ (Брусковай).

Нагадаем, Э.Зэльцэр і Ў.Функ былі затрыманыя ў аэрапарту Менска 12 сакавіка. Судовы працэс па іх крымінальных справах праходзіў пад старшынствам суддзі Дзмітрыя Клімовіча з 30 ліпеня па 11 жніўня ў закрытым рэжыме. Прадстаўнікі амабсад Расеі і ЗША, а таксама журналісты на суд дапушчаныя не былі. За выкарыстанне загадзя ілжывых дакументаў і замах на камерцыйны шпіянаж Э.Зеэльцэр быў прысуджаны да трох год пазбаўлення волі, У.Функ — да аднаго.

Э.Зэльцэру таксама інкрымінавалася кантрабанда наркатычных сродкаў, але суд апраўдаў яго, не прызнаўшы таблеткі, якія Зэльцэр прымае апошнія 15 гадоў і якія былі канфіскаваныя пры арышце, наркотыкамі. Амерыканскія ўлады дамагаюцца вызвалення асуджанага на гуманітарных падставах, паколькі ягонае здароўе моцна пагоршылася ў зняволенні без прапісаных ягоным доктарам лекаў.