Таемны суд над Зэльцэрам: адвакату забаронена распавядаць падрабязнасці

Судовыя слуханні па справе грамадзяніна ЗША Эмануіла Зэльцара і ягонага сакратара грамадзянкі Расеі Ўладлены Функ (Брусковай) будуць доўжыцца яшчэ некалькі тыдняў. Адвакат не мае права распавядаць журналістам аб ходзе працэсу.

Аб гэтым паведамілі агенцтву "Інтэрфакс-Захад" у Менскім гарадскім судзе. "Судовыя слуханні будуць доўжыцца яшчэ некалькі тыдняў", - паведамілі ў судзе.

Разам з тым там адмовіліся паведаміць, на якім этапе ў цяперашні час знаходзіцца судовы разгляд па крымінальнай справе ў адносінах Э.Зэльцэра і Ў. Функ, нагадаўшы аб тым, што працэс праходзіць за закрытымі дзвярыма. На пытанне аб даце пачатку судовых спрэчак і абвяшчэнні прысуду ў судзе заявілі: "Ніякай інфармацыі па справе суд выдаваць не будзе".

У сваю чаргу адвакат Э.Зэльцэра Зміцер Гарачка паведаміў агенцтву "Інтэрфакс-Захад", што "судовы працэс працягваецца. Усё ідзе ў адпаведнасці з Крымінальна-працэсуальным кодэксам Беларусі". "Іншай інфармацыі па дадзенай справе я сказаць не магу. З мяне ўзятая падпіска аб невыдаванні інфармацыі", - адзначыў адвакат.

Раней агенцтва са спасылкай на З.Гарачку паведамляла, што прысуд у адносінах Э.Зэльцэра, хутчэй за ўсё, будзе абвешчаны ў закрытым рэжыме.

Па ягоным прагнозе, судовыя слуханні па справе Э.Зэльцэра, якія пачаліся 30 ліпеня ў Менскім гарадскім судзе, "падоўжацца паўтара-два тыдні". "Хоць гэта мой прагноз, суд можа прыняць іншае рашэнне па тэрмінах судовага разгляду", - сказаў З.Гарачка.

Ён таксама паведаміў, што "нягледзячы на тое, што Э.Зэльцэр пачуваецца стабільна дрэнна, ён наладжаны на працу ў судзе. Ён не збіраецца яе зрываць".

З.Гарачка пры гэтым нагадаў, што ў першы дзень судовага працэсу ў зале суду ён даў падпіску аб невыдаванні інфармацыі аб ходзе судовага працэсу.

Першую падпіску аб невыдаванні інфармацыі па справе Э.Зэльцэра З.Гарачка даваў падчас дасудовага расследавання.

Як ужо паведамляў прэс-цэнтр Хартыі’97, Эмануіл Зэльцэр і ягоны сакратар былі затрыманыя ў Менску 12 сакавіка 2008 года. Першапачаткова затрыманым прад'яўляліся абвінавачванні ў прад'яўленні загадзя ілжывых афіцыйных дакументаў. Зэльцэр з'яўляецца адвакатам грамадзяніна ЗША Джозафа Кея, які з'яўляецца далёкім сваяком грузінскага бізнэсмэна Бадры Патаркацышвілі. Пасля смерці 13 лютага Патаркацышвілі Дж.Кей прад'явіў дакументы, паводле якіх ён прызначаны выканаўцам завяшчання памерлага. Дакументы былі складзеныя Э.Зэльцэрам, аднак сваякі Патаркацышвілі абвясцілі іх падробкай, пасля чаго Зэльцэр быў затрыманы ў Менску. 13 мая суд Тбілісі прызнаў Кея выканаўцам завяшчання, пацвердзіўшы тым самым сапраўднасць дакументаў.

Падрабязнасці арышту Зэльцэра афіцыйна не каментуюцца, паколькі справа мае статут дзяржаўнай тайны.

27 мая з-за лекаў, якія адвакат прывёз з сабой у Беларусь, паколькі пакутуе хранічнымі хваробамі, у адносінах яго была ўзбуджаная яшчэ адна крымінальная справа — па ч. 1 арт. 328 (незаконная перавозка і захоўванне наркатычных сродкаў) і ч. 2 арт. 228 (кантрабанда наркатычных сродкаў) Крымінальнага кодэкса Беларусі. Лекар Э.Зэльцэра неаднаразова звяртаўся ў Генпракуратуру, паказваючы, што лекі, якіх той пазбавіўся пры затрыманні, яму жыццёва неабходныя. Ён таксама заявіў, што ніколі не інфармаваў свайго пацыента аб тым, што ў склад прэпаратаў уваходзяць рэчывы, якія могуць лічыцца наркатычнымі.

Амерыканскі адвакат таксама не прызнае сябе вінаватым у інкрымінуемым яму «камерцыйным шпіянажы» і называе сваю справа «цалкам сфальсіфікаванай».

Сваякі Зэльцэра і, у прыватнасці, ягоны брат Марк Зэльцэр, звязваюць затрыманне Эмануіла ў Беларусі з ягонай справай па спадчыне Бадры Патаркацышвілі.

Як сцвярджае брат Эмануіла Зэльцэра, бізнэсмэн Барыс Беразоўскі датычны да арышту Зэльцэра ў Беларусі. Марк лічыць, што Беразоўскі планаваў загадзя візіт Эмануіла Зэльцэра ў Беларусь.

Дзяржаўны дэпартамент ЗША патрабуе ад беларускіх улад неадкладнага вызвалення амерыканскага адваката. 25 красавіка консул Злучаных Штатаў Амерыкі Кэралайн Сэвэдж сустракалася з арыштаваным. Па словах консула, Зэльцэр паведаміў ёй, што «на другі і трэці дзень затрымання яго збівалі». Адвакат вельмі схуднеў, саслабеў, яму цяжка хадзіць, размаўляць.