Фатографу «Народнай Волі» не дазволілі здымаць датэрміновае галасаванне

Фотакарэспандэнту недзяржаўнай газеты «Народная Воля» Юрыю Дзедзінкіну сёння раніцай не дазволілі праводзіць фотаздымку на выбарчым участку, дзе пачалося датэрміновае галасаванне.

Каля 10.50 фотакар прыйшоў на выбарчы ўчастак № 398 у Менску. Участковай выбарчай камісіі Ю. Дзезінкін прад'явіў пасведчанне карэспандэнта згаданай газеты. Аднак праводзіць фотаздымку яму не дазволілі, матываваўшы гэта тым, што фатаграфаваць забараніў старшыня ўчастковай камісіі Эльман Хасіеў. Хаця самога старшыні ў гэты час на выбарчым участку не было.

Сакратар Цэнтравыбаркама Мікалай Лазавік лічыць, што адмова тлумачыцца няздольнасцю журналіста наладзіць «чалавечыя адносіны» з сябрамі выбарчай камісіі. У гутарцы з прэс-службай БАЖ ён пацвердзіў, што забарона журналісту зарэгістраванага СМІ працаваць на выбарчым участку з'яўляецца парушэннем выбарчага заканадаўства. Але ён упэўнены, што «сапраўдны журналіст» здольны «дамовіцца» з выбарчай камісіяй. «Гэтае маё асабістае меркаванне», — удакладніў сакратар ЦВК.

Што жа аб гэтым кажа Выбарчы Кодэкс? У адпаведнасці з арт. 13 Выбарчага кодэкса, прадстаўнікі сродкаў масавай інфармацыі маюць права прысутнічаць на паседжаннях камісій. Ніякай акрэдытацыі для гэтага не патрабуецца. Напрыклад, у п. 11 пастановы Цэнтральнай камісіі № 54 ад 12 кастрычніка 2006 г. «Аб парадку ўжывання часткі трэцяга артыкула 13 Выбарчага кодэкса Рэспублікі Беларусь пры падрыхтоўцы і правядзенні выбараў у мясцовыя Саветы дэпутатаў Рэспублікі Беларусь дваццаць пятага склікання» паказваецца, што прадстаўнікі сродкаў масавай інфармацыі пры асвятленні падрыхтоўкі і правядзення выбараў маюць права прысутнічаць на паседжаннях выбарчых камісій, у памяшканнях для галасавання пры прад'яўленні дакумента, які сведчыць іх статут. Гэтае палажэнне дапоўненае ўказаннем (якое раней у аналагічных пастановах Цэнтральнай камісіі адсутнічала), што звесткі аб прадстаўніках СМІ, прысутных на паседжаннях камісій, на ўчастках для галасавання, заносяцца ў журнал з указаннем прозвішча, імя, імя па бацьку журналіста і наймення прадстаўлянага ім сродку масавай інфармацыі