Беларуская дэнамінацыя – фантазія, падобная да праўды?

У Беларусі актыўна абмяркоўваецца магчымасць дэнамінацыі рубля і пераходу ў якасці аплатнага сродку на расейскі рубель. Чыноўнікі аспрэчваюць гэтую інфармацыю, а эксперты казаць нешта пэўнае не рызыкуюць.

Паведамленні аб будучай дэнамінацыі беларускай нацыянальнай валюты і аб увядзенні ў Беларусі ў якасці аплатнага сродку расейскага рубля з'явіліся адначасова адразу жа пасля святкавання Новага года.

Істотнай дапамогай для тыражавання інфармацыі аб увядзенні расейскага рубля і дэнамінацыі сталі рост стаўкі рэфінансавання Нацыянальнага Банка з 12 да 14 адсоткаў, а таксама 20-адсоткавая дэвальвацыя беларускага рубля. Апошняя мера прама супярэчыла нядаўнім абяцанням кіраўніцтва краіны, а таму зерне новых чутак патрапіла на добрую глебу, перадае «Нямецкая хваля».

Спасылкі і аспрэчанні

Інфармацыя, што распаўсюджваецца тэт-а-тэт, даходзіць да дзіўнай дэталізацыі: маўляў, у Менску ўжо прызямлілася два самалёта c расейскімі грашыма, а дэнамінацыя будзе абвешчаная прама заўтра.

Алею ў агонь падліў і адзін з беларускіх Інтэрнэт-рэсурсаў, які паведаміў са спасылкай на кіраўніка Нацбанка Пятра Пракаповіча аб выдаленні нулёў з нацыянальных грошзнакаў. Галоўная крэдытна-фінансавая структура краіны тут жа выступіла з аспрэчаннем гэтых звестак, назваўшы іх "стоадсоткавай фальшыўкай" і "дыверсіяй супраць эканамічнай стабільнасці краіны". Аднак гутаркі на гэтую тэму не зніклі. Мала таго, калі афіцыйны курс даляра ў Беларусі са студзеня вырас з 2200 рублёў да 2650 рублёў, то на некаторых рынках за даляр ужо даюць па 3 тысячы.

Кошт рызык

Як тлумачаць самі прадпрымальнікі, у кошт тавара яны закладваюць магчымыя рызыкі, звязаныя з ваганнямі курсу валют. Па словах Сяргея, камерсанта, гандлюючага на менскім рынку "Дынама", пасля таго, як на 20 адсоткаў упаў курс рубля, прадпрымальнікі ў сваіх разліках зыходзяць з суадносін 1 даляр за 2750-2800 рублёў, каб падстрахавацца.

Такая перастрахоўка, у сваю чаргу, з'яўляецца новым каталізатарам для чутак. Як растлумачыў Сяргей, калі ўлады за адзін дзень апусцілі курс рубля на 20 адсоткаў, то ніхто не ведае, што з ім будзе далей. Шматлікія думаюць, адзначыў бізнэсмэн, што ў лютым за даляр будуць даваць да 3500 рублёў. А бо гэтыя рублі трэба яшчэ перавесці ў валюту, якая цяпер у абменных пунктах у дэфіцыце.

Немэтазгодныя меры

Паведамленні аб магчымым увядзенні расейскага рубля ў Беларусі ў якасці аплатнага сродку пракаментаваў кіраўнік аналітычнага цэнтра "Стратэгія" Леанід Заіка. Па ягоных словах, курсы беларускага і расейскага рублёў цяпер сінхранізуюцца. А таму, калі беларускі ўрад два нулі закрэсліць, "Нацбанк правядзе дэнамінацыю, і атрымліваецца, што мы выходзім на курс адзін да аднаго".

А вось былы кіраўнік Нацбанка Станіслаў Багданкевіч лічыць, што пераход на расейскі рубель азначае частковую страту суверэнітэта, на што беларускае кіраўніцтва, упэўнены Багданкевіч, наўрад ці пагодзіцца. Што датычыцца закрэслівання нулёў, то, па меркаванні банкіра, дэнамінацыю праводзіць, у прынцыпе, ёсць сэнс, але пры нулявой інфляцыі. Калі жа інфляцыя дасягае двухзначнай велічыні, а кошты растуць, дадзеная мера, па меркаванні Багданкевіча, немэтазгодная.

Аднак казаць з якой-небудзь упэўненасцю аб тых або іншых магчымых дзеяннях беларускіх улад, а, значыць, аспрэчваць або пацвярджаць рознага кшталту сенсацыйную інфармацыю, незалежныя беларускія эканамісты зараз ужо не рызыкуюць.