«Беларусьфільм» вырашыў адсудзіць у Расеі «Корцік» і «Прыгоды Бураціна»
16- 23.10.2009, 13:53
Кінастудыя «Беларусьфільм» мае намер падаць іск у Арбітражны суд Масквы з мэтай абароны сваіх правоў на савецкія кінастужкі беларускай вытворчасці.
Пра гэта «Інтэрфаксу» паведамілі ў прэс-службе кінастудыі.
«У архівах Расеі захоўваецца каля 600 фільмаў, (170 з іх знаходзіцца ў Дзяржтэлерадыёфондзе РФ), маёмасныя правы на якія належаць нацыянальнай кінастудыі «Беларусьфільм», а значыць, з’яўляюцца ўласнасцю Рэспублікі Беларусь. Законнае вяртанне нацыянальнай інтэлектуальнай уласнасці патрабуе актывізацыі з боку дзяржаўных органаў і службаў. Праблема вырашаецца вельмі павольна. «Беларусьфільм» мае намер самастойна падаць іск у Арбітражны суд Масквы з мэтай абароны законных правоў нацыянальнага кінематографа і прадухілення незаконнага выкарыстання аб’екта інтэлектуальнай уласнасці Рэспублікі Беларусь», заявілі ў прэс-службе.
Там таксама падкрэслілі, што ў СССР зыходныя матэрыялы ўсіх створаных фільмаў перадаваліся на захаванне ў архівы, якія зараз тэрытарыяльна знаходзяцца ў Расеі.
Сітуацыю, якая склалася, у прэс-службе кінастудыі назвалі «дзяржаўным рэйдэрствам з боку Дзяржтэлерадыёфонда Расеі».
«Упершыню прэцэдэнт дзяржаўнага рэйдэрства ўзнік у адносінах мастацкага фільма «Прыгоды Бураціна», «знятага ў 1975 годзе на кінастудыі «Беларусьфільм» і які належыць ёй», адзначылі ў прэс-службе.
Як паведамлялася раней, прадстаўнікі Дэпартамента па кінематаграфіі міністэрства культуры Беларусі звярталіся да расейскіх калег з патрабаваннем вырашыць пытанне па вяртанні ў Беларусь зыходных матэрыялаў кінастужак, створаных «Беларусьфільмам» падчас існавання СССР.
«Беларусьфільмам», у прыватнасці, былі знятыя такія стужкі як «Корцік», «Бронзавая птушка», Рыжы, сумленны, закаханы», «Белыя росы», «Ідзі і глядзі».
