МЗС Эстоніі назваў мэту вучэнняў у Беларусі - адрэзаць краіны Балтыі ад НАТА
11- 25.10.2009, 16:11
Урмас Паэт раскрытыкаваў на Рыжскай канферэнцыі расейска-беларускія ваенныя манеўры.
Ваенныя вучэнні ля межаў краінаў Балтыі сведчаць пра тое, што Расея па-ранейшаму выкарыстоўвае істотныя сродкі для барацьбы з НАТА, заявіў 24 кастрычніка кіраўнік Міністэрства замежных справаў Эстоніі Урмас Паэт, паведамляе Gazeta.ru са спасылкай на «Інтэрфакс».
Праведзеныя Расеяй вучэнні ля межаў краінаў Балтыі былі найбуйнейшымі за дзесяць гадоў, а іх мэтай было «адрэзаць тры краіны Балтыі ад НАТА», упэўнены Паэт.
«Гэтыя вучэнні паказваюць стыль мыслення, які па-ранейшаму існуе ў Маскве», - зрабіў выснову кіраўнік МЗС.
Раней пра тое, што ў сцэнар расейска-беларускіх вучэнняў «Захад-2009» уваходзіла ўварванне ў краіны Балтыі ў межах вызвалення «абкружанага Калінінграда» казаў міністр абароны Латвіі Імантс Ліегіс.
Нагадаем, што яшчэ ў канцы верасня беларускі ваенны аналітык Аляксандр Алесін заяўляў, што падчас вучэнняў адпрацоўвалася сітуацыя, калі расейскія войскі вызваляюць Калінінград, а затым «займаюць балтыйскі плацдарм».
У сваю чаргу прэзідэнт Эстоніі Томас Хендрык Ільвес прапанаваў правесці ў адказ вучэнні НАТА ў Балтыі.
