Мінабароны абмежавала выкарыстанне мабільнай сувязі
22- 18.11.2009, 8:55
«Тэрміновікі», курсанты і рэзервісты з гэтага часу змогуць карыстацца асабістай мабільнай сувяззю толькі ў абмежаваным фармаце.
Бурны рост карыстальнікаў мабільнай сувязі прымусіў Міністэрства абароны вызначыць парадак выкарыстання асабістых мабільных тэлефонаў вайскоўцамі тэрміновай ваеннай службы, рэзервістамі, курсантамі ваенных навучальных установаў і ваеннаабавязанымі, прызванымі на зборы, паведамляе «Ежедневник».
З мэтай аховы ваенных сакрэтаў з гэтага часу на падставе Пастановы Мінабароны №47 ад 03.09.2009 года ўсе пазначаныя катэгорыі вайскоўцаў могуць карыстацца сваімі мабільнымі тэлефонамі толькі ў строга вызначаных выпадках. Цяпер маладому салдату ў цяжкую хвіліну фактычна немагчыма будзе патэлефанаваць родным і паскардзіцца на цяжкае жыццё.
Карыстацца тэлефонамі можна будзе толькі ў гадзіны, спецыяльна вызначаныя для асабістых патрэбаў вайскоўцаў, у выходны дзень, пры накіраванні да месца службы, лячэння і назад, знаходжанні па-за размяшчэннем вайсковай часткі на адпачынку, у звальненні ці водпуску. Ва ўсіх астатніх выпадках вайскоўцы, курсанты і рэзервісты абавязаныя будуць здаваць свае слухалкі на часовае захоўванне ў дзяжурную частку ці іншыя службы, вызначаныя загадам начальніка часткі.
