Хэнлан адмовіўся працаваць у Беларусі – яму ўсё надакучыла
20- 2.11.2009, 13:35
Канадзец Глэн Хэнлан вырашыў усё ж пакінуць пасаду галоўнага трэнера зборнай Беларусі па хакеі.
Як інфармуе афіцыйны сайт нацыянальнай Федэрацыі хакея Рэспублікі Беларусь, раніцай 2 лістапада Хэнлан у прыватнай размове са старшынём ФХРБ Уладзімірам Навумавым заявіў пра спыненне супрацоўніцтва з нашай камандай. Такое рашэнне ён матываваў маральна-псіхалагічным станам.
«Пасля доўгіх і грунтоўных роздумаў я прыйшоў да высновы, што для каманды і яе вынікаў будзе лепш, калі я ўсё ж сыйду. Хачу асобна выказаць удзячнасць Уладзіміру Уладзіміравічу за магчымасць узначальваць беларускую зборную цягам некалькіх гадоў. Таксама хачу сказаць дзякуй супрацоўнікам федэрацыі, хакеістам, журналістам і заўзятарам за падтрымку нацыянальнай каманды. Я веру ў будучыню беларускага хакея і шчыра жадаю ўдачы вашай камандзе на Алімпіядзе і чэмпіянаце света», - пракаментаваў Хэнлан прэс-службе ФХРБ сваю адстаўку.
Імя спецыяліста, які ўзначаліць беларускую зборную на Кубку Палесся, будзе абвешчана хуткім часа, перадае «Тэлеграф».
Нагадаем, што 20 кастрычніка 2009 года Глэн Хэнлан быў адпраўлены ў адстаўку з пасады настаўніка менскага «Дынама» пасля хатняй паразы ад хабараўскага «Амура» (1:4). Разам з Глэнам Хэнланам з менскага «Дынама» звольнены намеснік гендырэктара па хакейных аперацыях Шон Сімпсан, а таксама асістэнты Дэйв Л’юіс і Уладзімір Цыплакоў.
Трэнер брамнікаў Мікаэль Ленэр і спецыяліст па фізпадрыхтоўцы Гарнэт Браўн працягнуць працу, будуць дапамагаць новаму галоўнаму трэнеру Аляксандру Андрыеўскаму, які цягам апошніх паўтара гадоў з’яўляўся настаўнікам «Гомеля».
Але ў той жа час старшыня ФХРБ Уладзімір Наўмаў папрасіў Хэнлана застацца на чале нацыянальнай зборнай. Канадзец узяў час на роздумы і 22 кастрычніка даў сваю згоду, пачаўшы падрыхтоўку да Кубка Палесся, які пройдзе пятага-восьмага лістапада ў Бабруйску і Жлобіне. Аднак сёння ўсё ж вырашыў адмовіцца ад працы ў Беларусі.
Глэн Хэнлан узначальваў зборную Беларусі на чэмпіянатах света ў 2005, 2006 і 2009 гадах. Пад яго кіраўніцтвам беларуская дружына заняла шостае месца на ЧС у Рызе, што стала лепшым вынікам нашай каманды на сусветных першынствах. Глэн Хэнлан прызнаваўся трэнерам года ў Беларусі ў 2006 і 2009 гадах.
