Захарава зацвердзілі на пасадзе галоўнага трэнера зборнай па хакеі
1- 25.11.2009, 11:28
Вядомы хакейны спецыяліст Міхаіл Захараў зацверджаны на пасадзе галоўнага трэнера зборнай Беларусі на паседжанні выканкама Федэрацыі хакея.
Як нагадвае «Інтэрфакс» , Міхаіл Захараў 17 лістапада загадам Міністэрства спорта і турызму, паводле хадайніцтва сталай камісіі НАК Беларусі па працы з федэрацыямі па відах спорта быў прызначаны галоўным трэнерам нацыянальнай алімпійскай каманды па хакеі з шайбай на перыяд яе падрыхтоўкі і ўдзелу ў XXI Алімпійскіх гульнях.
Захараў таксама з’яўляецца галоўным трэнерам зборнай Украіны па хакеі. Акрамя гэтага, ён кіруе камандай ХК «Юнацтва-Менск», якая выступае ў Адкрытым чэмпіянаце Беларусі.
Захараў ужо ўзначальваў зборную Беларусі па хакеі, аднак сыйшоў у адстаўку ў лютым 2005 года пасля таго, як зборная не здолела выйграць кваліфікацыйны турнір Алімпіяды-2006 у Турыне.
Месца галоўнага трэнера зборнай Беларусі стала вакантным пасля таго, як 2 лістапада ў адстаўку падаў канадзец Глэн Хэнлан, які ўзначальваў каманду.
Зборная Беларусі згуляе ў хакейным турніры зімовай Алімпіяды-2010, дзе на папярэднім этапе яе суперніцамі стануць каманды Швецыі, Фінляндыі і Нямеччыны.
