Беларускіх чыноўнікаў пратэстуюць на схільнасць да карупцыі

Генеральная пракуратура мае намер правесці структурныя пераўтварэнні ў сістэме дзейнасці органаў дзяржаўнага кіравання.

Пра тое, што надыйшоў час гэта зрабіць, заявіў падчас шостай Рэспубліканскай каардынацыйнай нарады па барацьбе са злачыннасцю і карупцыяй намеснік генеральнага пракурора Беларусі Віктар Конан. На яго думку, праведзены пракуратурай аналіз сведчыць пра тое, што рост карупцыі ў краіне адбываецца з прычыны таго, што прыманыя праваахоўнымі органамі меры носяць у асноўным спыняльны і забарончы характар і не закранаюць структурных пераўтварэнняў сістэмы дзейнасці дзяржаўнага кіравання, перадае «Ежедневник».

Структурныя пераўтварэнні – гэта стварэнне сістэмы ранняга выяўлення асобаў, схільных да карупцыі і вызваленне іх ад займаных пасадаў.

Як заявіў Конан, у краіне дагэтуль не створаная сістэма першаснага кантролю за фактамі карупцыйных паводзінаў патэнцыйна рызыкоўных суб'ектаў кіраўнічай дзейнасці, не забяспечваецца сістэма аператыўнага адхілення такіх асобаў ад займаных пасадаў. Паводле яго словаў, гэта робіць барацьбу з карупцыяй падобнай на барацьбу з вятракамі і зводзіць на нішто ўсе высілкі праваахоўных органаў па выкараненні карупцыі ва ўладзе. На месца аднаго выяўленага карупцыянера прыходзіць іншы, і працэс пачынаецца наноў.

На думку Генеральнай пракуратуры, надыйшоў час у корані змяніць падыход да барацьбы з гэтай з'явай і накіраваць высілкі менавіта на выяўленні схільных да карупцыі чыноўнікаў, каб прыбраць саму рызыку ўзнікнення карупцыйных праяваў. Па словах Конана, найбольшую небяспеку для грамадства нясе карупцыя ў органах дзяржаўнай улады і мясцовага самакіравання, перш за ўсё ў сферах выпрацоўкі і прыняцця кіраўнічых рашэнняў. І калі атрымаецца дапускаць да прыняцця рашэнняў толькі тых асобаў, якія не схільныя да парушэння закона і кіруюцца выключна інтэрасамі дзяржавы, дык гэта ў корані зменіць усю сітуацыю, заявіў Конан.