ЗША пакуль не сталі аднаўляць санкцыі ў адносінах двух беларускіх прадпрыемстваў

ЗША пакінулі ў сіле рашэнне, што выводзіць з-пад рэжыму амерыканскіх санкцый два беларускія прадпрыемствы – «Лакафарба» і «Полацак-шкловалакно».

Як абвясціў у панядзелак Мінфін ЗША, тэрмін дзеяння гэтага рашэння падоўжаны да 1 чэрвеня. Раней ён павінен быў мінуць 2 сакавіка.

Нагадаем, што санкцыі супраць лідскай «Лакафарбы» і полацкага «Шкловалакна» былі ўведзеныя 15 мая ў дадатак да эканамічных санкцый у адносінах канцэрна «Белнафтахім».

Упершыню санкцыі Мінфіна ў адносінах прадпрыемстваў «Белнафтахіма» былі ўведзеныя ў лістападзе 2007 года. Яны прадугледжвалі замарожванне ўсіх змешчаных пад юрысдыкцыяй ЗША банкаўскіх рахункаў канцэрна і ягоных прадстаўніцтваў у Германіі, Латвіі, Украіне, Расеі і Кітаі, а таксама рахункаў даччынай кампаніі «Белнафтахім Ю-эс-эй».

Санкцыі супраць рэжыму Лукашэнкі былі ўведзеныя з-за адмовы беларускіх улад вызваліць палітвязняў.