Бел-чырвона-белы сьцяг у гонар Кастуся Каліноўскага
- 9.02.2009, 9:01
7 лютага каля сёмай увечары на электрычных дратах над вуліцай Першамайскай у Віцебску залунаў нацыянальны сьцяг.
Пра акцыю Мірона даведаўся з вартых даверу крыніц апазыцыянэр Барыс Хамайда, перадае «Радыё Свабода».
Спадар Хамайда паведаміў таксама, што да сьцяга была прымацавана цыдулка з словамі:
«Да народзінаў нацыянальных герояў Беларусі Тадэвуша Касьцюшкі і Кастуся Каліноўскага. Абаронім нашу Радзіму! Нам ёсьць, з каго браць прыклад. Жыве Беларусь! Жыве вечна! Мірон».
Барыс Хамайда нагадаў, што дзень народзінаў Кастуся Каліноўскага 2 лютага, а дзень народзінаў Тадэвуша Касьцюшкі 4 лютага. Недалёка ад Кобрына месьціцца радавы маёнтак Касьцюшкаў, дзе будучы правадыр вядомага гістарычнага паўстаньня, а таксама нацыянальны герой Польшчы, ЗША і ганаровы грамадзянін Францыі правёў свае юнацкія гады.
