Прэзідэнт Еўрапарламента і генсакратар Рады Еўропы сустрэліся з беларускімі дэмакратамі
8- 12.03.2009, 10:11
Лідэр Аб'яднанай грамадзянскай партыі Анатоль Лябедзька і экс-кандыдат у прэзідэнты Аляксандр Казулін 11 сакавіка правялі ў Страсбурзе серыю сустрэч з кіраўніцтвам Еўрапарламента і Рады Еўропы.
На сустрэчах апазіцыйныя палітыкі выказалі прадстаўнікам ЕЗ сваё бачанне сітуацыі ў Беларусі. Аб гэтым у інтэрв'ю «Нямецкай хвалі» заявіў старшыня АГП Анатоль Лябедзька.
«Сустрэч было шмат. Вылучу, перш за ўсё, гутарку з прэзідэнтам Еўрапейскага парламента Хансам-Гертам Потэрынгам. Галоўнае, пра што ішла гаворка, - гэта сітуацыя ў Беларусі, дыялог Брусэля і Менска, магчымае запрашэнне Аляксандра Лукашэнкі ў Прагу на саміт ЕЗ, прысвечаны праграме «Ўсходняе партнёрства», а таксама рэзалюцыя па Беларусі, якая павінная быць прынятая Еўрапарламентам у пачатку красавіка», - распавядае ён.
Заява аб тым, што ў Беларусі ёсць палітвязні, была вельмі нечаканай для спікера Еўрапарламента.
«Шматлікае з таго, што мы распавялі, было адкрыццём для спадара Потэрынга – і тое, што датычыцца з'яўлення ў Беларусі новых палітвязняў, і нашыя адзнакі нядаўняга візіту ў Менск вярхоўнага прадстаўніка ЕЗ па знешняй палітыцы Хаўера Саланы. Для спікера Еўрапарламента сталася цікаўная тая акалічнасць, што прадстаўнікі дэмакратычных сіл, падтрымліваючы стратэгію дыялогу Еўразвяза з Беларуссю, крытычна ставяцца да таго, як ён рэалізуецца зараз на практыцы», - заявіў Лябедзька.
Палітык адзначыў, што падтрымліваць дыялог з Аляксандрам Лукашэнкай абсалютна неэфектыўна, бо беларускі кіраўнік не збіраецца абмяркоўваць пытанні правоў чалавека і дэмакратыі.
«Гэта дыялог без апазіцыі, без беларусаў, якія падтрымліваюць еўрапейскія каштоўнасці, а таксама без абмеркавання пытанняў правоў чалавека і дэмакратыі, занясенне якіх у позву дня непрыемна для Лукашэнкі. Такая стратэгія дыялогу, па нашым меркаванні, з'яўляецца тупіковай і цалкам неэфектыўнай.
Мы займаем цвёрдую пазіцыю - Лукашэнка не павінен ехаць у Прагу, паколькі гэта фактычна будзе азначаць, што ў супрацьстаянні дзвюх «Д», дэмакратыі і дыктатуры, апошняя атрымала перамогу. Будзе характэрна, калі Лукашэнку запросяць у Прагу на 40-годдзе Пражскай вясны. Акрамя таго, 7 мая споўніцца роўна 10 год са дня выкрадання аднаго з лідэраў апазіцыі, экс-міністра ўнутраных спраў Юрыя Захаранкі», - адзначыў лідэр АГП.
Па словах Анатоля Лябедзька, спікер Еўрапарламента прыняў рашэнне звярнуць асаблівую ўвагу на тое, як выконваюцца правы чалавека ў Беларусі.
«Пасля нашай гутаркі спадар Потэрынг даў указанне сваім памочнікам падрыхтаваць моцную рэзалюцыю па Беларусі, якая ўлічвала бы ўсе аспекты, і была б для Еўрапарламента адказам на пытанне: што важней - эканамічны прагматызм або дэмакратыя? Па нашым агульным меркаванні, спікер Еўрапарламента прытрымваецца меркавання, што дэмакратыя і правы чалавека важней», - сказаў ён.
Сярод іншых сустрэч з еўрапейскімі палітыкамі ў Страсбурзе Анатоль Лябедзька асабліва вылучае сустрэчу з Генеральным сакратаром Рады Еўропы Тэры Дэвісам.
«Гутарка датычылася перспектываў узаемаадносін Беларусі і Рады Еўропы. Пакуль гэтыя перспектывы, па словах Тэры Дэвіса, уяўляюцца досыць праблематычнымі. Іншымі словамі, Генсак Рады Еўропы заявіў, што не бачыць ніякіх падставаў для таго, каб у бліжэйшай перспектыве Беларусь стала ўдзельнікам Рады Еўропы.
Пасля візіту ў Страсбург стала зразумела, што еўрапейскія палітыкі не спяшаюцца вырашаць пытанне аб удзеле Беларусі ва «Ўсходнім партнёрстве», а таксама аб запрашэнні Лукашэнкі на саміт ЕЗ у Празе ў карысць улад краіны», - дадаў Анатоль Лябедзька.
