Перформанс супраць будаўніцтва АЭС прайшоў у Салігорску (Фота)
4- 3.03.2009, 17:40
У Салігорску актывісты грамадзянскай кампаніі «Еўрапейская Беларусь» правялі акцыю супраць будаўніцтва АЭС у Беларусі.
Двое маладых людзей, апранутыя ў спецвопратку, раздавалі ўлёткі, якія папярэджвалі, што будаўніцтва АЭС – гэта вялікая рызыка для экалогіі і эканомікі краіны.
Акцыю правялі актывісты экалагічнай ініцыятывы «ЭкаАбарона», якая далучылася да грамадзянскай кампаніі «Еўрапейская Беларусь».
Нагадаем, пляцоўка для будаўніцтва беларускай АЭС знаходзіцца ў паўночнай частцы Астравецкага раёна Беларусі. Паўночны захад Беларусі — край найпрыгажэйшых азёраў, размешчаных сярод маляўнічых узгоркаў. Месца, багатае на запаведнікі і заказнікі. Непадалёк размешчаны нацыянальны парк Нарачанскі — самае папулярнае месца адпачынку ў Беларусі.
Намер уладаў будаваць АЭС выклікаў пратэсты з боку навукоўцаў і насельніцтва. Беларусь з'яўляецца краінай, якая найбольш пацярпела ад аварыі на Чарнобыльскай АЭС. Навукоўцы выступаюць за недапушчальнасць размяшчэння на тэрыторыі краіны ядзернай зброі і яе элементаў, будаўніцтва АЭС і захавання ядзерных адыходаў.
Надзвычайны і Паўнамоцны амбасадар Літвы ў Беларусі Эдмінас Багдонас таксама заяўляў, што Літву турбуе наяўнасць закрытай афіцыйнай інфармацыі і актыўны ўдзел Расеі ў праекце будаўніцтва беларускай АЭС.