Аляксандр Старыкевіч: «Жадання разнявольваць медыярынак у ўладаў няма»
- 1.04.2009, 8:23
Незалежныя беларускія СМІ не вераць у так званую лібералізацыю і адзначаюць, што ўлады баяцца свабоды слова.
Эксперты кажуць, што вяртанне ў сістэму распаўсюду дзвюх незалежных газет не сведчыць аб зняцці праблемы даступнасці інфармацыі для насельніцтва, перадае «Нямецкая Хваля».
Восенню 2008 года ў манапалізаваную дзяржавай сістэму распаўсюду перыёдыкі вернутыя два незалежных выдання - газеты «Народная воля» і «Наша Ніва». Гэта той вынік, які можна «памацаць», у тым ліку замежным сябрам беларускай «дэмакратыі». Невыпадкова, старшыня працоўнай групы па Беларусі Парламенцкай Асамблеі АБСЕ Ута Цапф падчас аднаго з апошніх сваіх візітаў у Менск менавіта гэты факт прывяла ў якасці прыкладу пачатку пазітыўных змен у краіне.
«Дзве газеты, якія лічацца незалежнымі і апазіцыйнымі, уключаныя ў каталог, і мой калега ўчора купіў адну з такіх газет прама ў кіёску ля адміністрацыі прэзідэнта. Я, вядома, гэтую газету захаваю», - сказала тады Ута Цапф.
Паміж тым старшыня «Беларускай асацыяцый журналістаў» Жана Літвіна робіць акцэнт на захаванні праблемы распаўсюджвання недзяржаўных СМІ. Акрамя дзвюх названых газет засталіся «адлучанымі» ад сістэмы Белсаюздрука яшчэ 13 выданняў.
«Праблема існуе ўжо 3,5 ггады, - адзначае кіраўнік БАЖ. - І тое, што гэтае пытанне ўносілася ў позву дня наступнага паседжання грамадскага каардынацыйнага савета ў галіне СМІ з велізарнымі складанасцямі, сведчыць аб тым, што яна сапраўды амаль невырашальная».
Рэдактар электроннай газеты «Ежедневник» Сяргей Сацук заклікае не спяшацца з высновамі: «Да восені можна будзе падвесці вынікі і зразумець – улады ад чыстага сэрца зрабілі крок насустрач прэсе, альбо гэта быў вымушаны крок, які носіць часовы характар».
Галоўны рэдактар газеты «Салідарнасць» Аляксандр Старыкевіч распавядае, што калі ягоная газета была адлучаная ад манапалізаванай дзяржавай сістэмы распаўсюду, ёй прыйшлося пераўтварыцца ў інтэрнэт-газету.
Сам Аляксандр Старыкевіч са скепсісам кажа аб дэкларуемай уладамі лібералізацыі. «13 газет спрабуюць дамагчыся, каб іх таксама распаўсюджвалі праз дзяржсетку. Бескарысна! І цалкам відавочна, што гэта свядомае рашэнне ўлад».
Аляксандр Старыкевіч робіць выснову, што ніякага жадання разнявольваць медыярынак у ўладаў няма, таму, што «свабодныя СМІ для іх з'яўляюцца галоўнай пагрозай».
