Беларускія прадпрымальнікі патрабуюць неадкладнага вызвалення палітвязняў
1- 20.04.2009, 12:40
Кардынацыйная рада прадпрымальнікаў Беларусі абвесціла салідарнасць з арыштаванымі ваўкавыскімі прадпрымальнікамі Аўтуховічам, Лявонавым і Асіпенкам.
Пра гэта кажацца ў заяве рады, распаўсюджанай 20 красавіка, перадае БелаПАН.
Трое актывістаў прадпрымальніцкага руху з Ваўкавыска былі затрыманыя 8 лютага 2009 года з санкцыі пракурора Гарадзенскай вобласці. 18 лютага ім прад'яўлена абвінавачванне па артыкуле 218 Крымінальнага кодэкса (наўмыснае знішчэнне альбо пашкоджанне маёмасці). Хаця за прад'яўленыя ім абвінавачванні вінаватыя ўжо даўно адбываюць пакаранні ў выглядзе пазбаўлення волі. Затрыманыя прадпрымальнікі знаходзяцца ў следчым ізалятары № 1 у Менску.
16 красавіка Мікалай Аўтуховіч абвясціў бестэрміновую галадоўку. Ён патрабуе ў найкарацейшы тэрмін альбо перадаць справу ў суд, альбо змяніць усім падследным па гэтай справе меру стрымання з утрымання ў следчым ізалятары пад вартавай на падпіску аб невыяздзе.
«Галадоўка Мікалая Аўтуховіча гэта не толькі пратэст супраць прававога бяспраўя і парушэння правоў чалавека па сваёй канкрэтнай справе, гэта барацьба за лепшую будучыню ўсёй Беларусі», — кажацца ў заяве Кардынацыйнай рады прадпрымальнікаў.
На думку аўтараў заявы, гэтая галадоўка дае шанец усім грамадзянскім і палітычным структурам заявіць аб сваёй падтрымцы Мікалая Аўтуховіча, Юрыя Лявонава і Уладзіміра Асіпенкі.
«Мы ганарымся мужнасцю нашага калегі. Мы салідарныя з Аўтуховічам, Лявонавым і Асіпенкам і іх сем'ямі. Мы ўдзячныя беларускім праваабарончым і палітычным структурам, якія не пабаяліся выказаць салідарнасць з затрыманымі. Мы ўдзячныя таксама прадстаўнікам міжнародных структураў, якія маральна падтрымалі прадпрымальнікаў і выказалі патрабаванні іх неадкладнага вызвалення», — гаворыцца ў заяве.
Кардынацыйная рада прадпрымальнікаў Беларусі заклікае «усіх людзей добрай волі зрабіць усё магчымае, каб у нашай краіне не было палітычных вязняў».
