На шклозаводзе «Нёман» скарочаны рэжым працы падоўжаны да сярэдзіны лета

Адміністрацыя прадпрыемства тлумачыць непапулярныя меры складанай эканамічнай сітуацыяй.

Амаль 500 працоўных бярозаўскага шклозавода «Нёман» ужо даўно пераведзеныя на чатырохгадзінны працоўны дзень. Перш за ўсё, гэта інжынерна-тэхнічны персанал і дапаможныя службы, нагадвае «Радыё Рацыя».

З пачатку года колькасць працоўных скарацілася больш чым на 160 чалавек. Як сцвярджаюць працоўныя шклозавода, скарочаны рэжым працы, несваечасовыя выплаты зарплатаў і іх памер – гэта галоўныя праблемы, якія сёння іх турбуюць.

Парушэнні працоўнага заканадаўства на шклозаводзе «Нёман» зацікавілі супрацоўнікаў дэпартамента дзяржаўнай інспекцыі працы: высветлілася, што акрамя затрымак зарплатаў з працоўнымі своечасова не разлічваюцца пры звальненнях і выхадзе ў чарговыя адпачынкі.