Алена Макуць: Мужа арыштавалі за тое, што працаваў разам з Аўтуховічам
2- 7.04.2009, 17:53
Цягам трох дзён арыштаванаму па справе Аўтуховіча Віктару Макуцю прад’явяць абвінавачаньні, паведаміла ягоная жонка Алена.
Галоўны мэханік кампаніі «Сьціф-Транс» Віктар Макуць быў арыштаваны ў Ваўкавыску ў панядзелак і дастаўлены ў менскую турму на Акрэсьціна.
Алена Макуць, жонка затрыманага, распавяла «Радыё Свабода», што ўчора прыехалі некалькі чалавек, рабілі ператрус у доме, прыбудоўцы і нават езьдзілі на лецішча. Знайшлі некалькі старых патронаў ад паляўнічай стрэльбы і забралі іх.
На думку спадарыні Макуць, яе мужа арыштавалі толькі за тое, што ён доўгі час працаваў разам зь Мікалаем Аўтуховічам. Зараз яна ў вельмі цяжкім стане і нават не магла назваць тых, хто забіраў яе мужа.
«Забралі, і ўсё. Сказалі, што праз тры дні затэлефануюць і скажуць, якія прад’яўляюць абвінавачаньні. Прабачце, але больш я не магу гаварыць, не магу, усё...» - плача жанчына.
Алена Макуць дадала, што ў мужа высокі ціск нырак, а яна нават ня бачыла, ці ўзяў ён з сабою лекі.Сама яна зараз не працуе, а даглядае сваю старую маці, якая ляжыць зпараліжаваная і амаль страціла зрок.
Дыспэтчар у фірме «Сьціф-Транс», дзе працуе Віктар Макуць, коратка ахарактарызаваў яго наступным чынам.
«Макуць — нармальны мужчына, сем’янін, у яго двое дарослых дзяцей, і папросту нармальны чалавек...», - сказаў ён.
Фірма «Сьціф-Транс» займаецца грузаперавозкамі і арандуе памяшканьне там, дзе працаваў Мікалай Аўтуховіч.
Нагадаем, што Віктара Макуця ўжо дапытвалі 8 лютага — у той дзень, калі затрымалі Мікалая Аўтуховіча, Юрыя Лявонава і Ўладзімера Асіпенку.
З слоў праваабаронцы Алега Воўчака, сьледчыя зараз заявілі, што тым разам Макуць мог нібыта «нешта схаваць ад сьледзтва і не пра ўсё распавесьці».
«Хутчэй за ўсё, яго хочуць затрымаць на тры дні, каб атрымаць хоць нейкую інфармацыю пад псыхалягічным ціскам», - сьцьвярджае ён.
8 лютага у кватэрах Мікалая Аўтуховіча, Юрыя Лявонава і Ўладзімера Асіпенкі адбыліся ператрусы, пасьля чаго ўсіх трох адвезьлі ў менскае СІЗА.
Паводле інфармацыі МУС, затрыманыя падазраюцца ў арганізацыі і зьдзяйсьненьні шэрагу цяжкіх злачынстваў.
Усім тром прад'яўлены абвінавачанні паводле артыкула 218 Крымінальнага кодэксу (наўмыснае зьнішчэньне або пашкоджаньне маёмасьці).
Родныя арыштаваных кажуць, што ніякіх зьвестак пра ход сьледзтва ім не паведамляюць.
