Абяцаных 700 даляраў заробку не будзе

Нават па самых аптымістычных прагнозах сярэдні заробак ў Беларусі будзе 400 даляраў.

«На канец пяцігодкі нам трэба заработную плату давесці, баюся гаварыць, да 700 даляраў, нікуды не падзенемся. 500 даляраў будзе мала. Трэба 700 – сярэдні заробак па краіне, - паставіў Аляксандр Лукашэнка задачу перад урадам падчас свайго штогадовага паслання ў маі мінулага года. Канец «пяцігодкі» - гэта 2010 год.

Але тут здарыўся крызіс. І што цяпер?

Газета «Комсомольская правда в Беларуси» сабрала прагнозы аб тым, колькі мы будзем атрымліваць хуткім часам.

Варыянт першы. Вельмі аптымістычны

2009 год - 1 млн. 160 тысяч рублёў (416 даляраў).

Такую лічбу заклаў ў бюджэт краіны ўрад. Прычым не проста ў бюджэт, а ў бюджэт, які перапісалі з-за крызісу.

Варыянт другой. Аптымістычны

2009 год - 1 млн. 18 тысяч рублёў (365 даляраў).

2010 год - 1 млн. 153 тысячы рублёў (413 даляраў).

На гэтыя грошы беларусы могуць разлічваць, калі спраўдзіцца аптымістычны прагноз Мінэканомікі.

Варыянт трэці. Песімістычны

2009 год - 930 тысяч рублёў (333 даляра).

2010 год - 1 млн. 8 тысяч рублёў (361 даляр).

А вось па самім горшым сцэнары чыноўнікаў, заробкі сёлета ўпадуць амаль на 9%, і толькі да канца наступнага года вернуць свае пазіцыі.

Але ж галоўнае гэта не заробкі, а тое, што за іх можна купіць. Для навочнасці мы перавялі заробкі ў «Доктарскую». Атрымалася, што ў пачатку 2008 года на заробак каля 760 тысяч рублёў можна было купіць 71 кілаграм кілбасы (па кошце 10 700 рублёў). І сёння на заробак ледзь больш за мільён «Доктарскай» можна купіць столькі жа. Ну, калі быць зусім дакладнымі, на 1 кілаграм больш: 72 кіло па кошце каля 14 тысяч рублёў. Атрымліваецца, грошай заплацілі амаль на 300 тысяч больш, а купіць можна практычна тое ж самае. Выходзіць, што нам проста кампенсавалі страты ад росту коштаў. Страшна ўявіць, што будзе, калі заробкі пачнуць памяншацца! Бо прагнозаў аб тым, што кошты ўпадуць ўслед за заробкамі, чыноўнікі не агучвалі.