Сідорскі б'е трывогу: адмоўнае сальда з Расеяй імкліва павялічваецца
24- 9.04.2009, 17:10
Прэм'ер-міністр Беларусі Сяргей Сідорскі заявіў, што гандлёвы баланс з Расеяй складаецца «не на карысць Беларусі».
Як паведамляе «Інтэрфакс», 9 красавіка прэм'ер-міністр Сяргей Сідорскі зноў нагадаў, Расея не выконвае абяцанняў па забеспячэнні роўнага доступу беларускіх і расейскіх тавараў на рынкі двух дзяржаваў.
«Гэтыя рашэнні пакуль блакуюцца расейскім бокам», - сказаў Сідорскі.
Пры гэтым ён падкрэсліў, што «былі даручэнні скончыць працу ў лютым па забеспячэнні роўнага доступу і па ўзаемных саступках».
«Але ўжо красавік, а рашэнні не прынятыя», - дадаў ён.
«Можа быць, у чыноўнікаў, якія знаходзяцца ля вытокаў нараджэння дакументаў, і ёсць час, але ва урада такіх тэрмінаў няма: за намі працоўныя месцы, зарабатная плата», - падкрэсліў Сідорскі.
Разам з тым ён звярнуў увагу, што ў яго адбыліся тэлефонныя гутаркі з старшынём расейскага ўрада Уладзімірам Пуціным, падчас якіх выказвалася падтрымка рашэнням, прынятым падчас паседжання Вышэйшага дзяржсавета.
Сідорскі падкрэсліў, што «мы просім роўнай канкурэнцыі, а не прэферэнцыяў». Разам з тым, па словах прэм'ера, «расейскія калегі высоўваюць прэтэнзіі, якія практычна ніяк не ўплываюць на наш таваразварот».
Прэм'ер распавёў, што за два месяцы бягучага года Беларусь паставіла ў Расею прадукцыі на $800 млн, а набыла - на $2,1 млрд.
Такім чынам, толькі за два месяцы адмоўнае сальда ў гандлі з Расеяй склала 1,3 мільярда даляраў.
Па словах Сідорскага, калі вылічыць з аб'ёму імпарту кошт нафты і газу, дык баланс усё роўна складаецца не на карысць Беларусі.
«Мы камплектуючых набылі больш, чым паставілі гатовай прадукцыі», - сказаў кіраўнік беларускага ўрада, дадаўшы, што такім чынам была аказаная падтрымка расейскай эканоміцы.
«Не разумею: навошта тады стрымліваць гандлёва-эканамічны абарот?», - сказаў Сяргей Сідорскі.
