Да канца мая Беларусь чакае ад Расеі 500 мільёнаў даляраў крэдыту
10- 20.05.2009, 9:15
Афіцыйны Менск разлічвае ў бліжэйшы час атрымаць другі транш расейскага крэдыту.
Аб гэтым заявіў у аўторак першы намстаршыні ўпраўлення Нацыянальнага банка Павел Каллаўр.
«Пытанне аб атрыманні расейскага крэдыту абмяркоўваецца, і мы не страчваем надзеі атрымаць яго ў канцы мая», - сказаў Каллаўр. Ён нагадаў, што ў канцы мая ў Менску пройдзе паседжанне «саюзнага саўміна», і не выключыў, што на ім будзе абмяркоўвацца дадзенае пытанне, а таксама магчымасць атрымання расейскага крэдыту ў 100 млрд расейскіх рублёў для ўзаемаразлікаў у гандлі з Расеяй, паведамляе ІТАР-ТАСС.
«На ім будуць разглядацца агульныя антыкрызісныя меры, а пытанне прыцягнення дадатковых сродкаў з'яўляецца адной з антыкрызісных мер для Беларусі», - сказаў Павел Каллаўр.
Па афіцыйнай інфармацыі, у канцы мінулага года Расея і Беларусь дамовіліся аб стабілізацыйным крэдыце ў 2 млрд даляраў, які рэспубліка атрымлівае па частках. Акрамя гэтага, Беларусь крэдытуюць Венесуэла і МВФ. У снежні мінулага года беларусы прыцягнулі дзяржкрэдыт Венесуэлы на 0,5 млрд даляраў, а ў студзені бягучага года паступілі 788 млн даляраў першага транша стабкрэдыта МВФ на 2,46 млрд даляраў.
