Банкі адмаўляюцца выдаваць крэдыты на выплату заробкаў

Праўладавы прафсаюз прызнаўся, што беларускім прадпрыемствам няма чым плаціць сваім працаўнікам.

«У красавіку-маі ў першасныя арганізацыі непасрэдна ад працаўнікоў прадпрыемстваў пачалі паступаць сігналы аб затрымцы заработнай платы працоўным калектывам. Справа ў тым, што банкі пачынаюць адмаўляць прадпрыемствам у выдачы крэдытаў на заработную плату нават пры пагашэнні папярэдняга крэдыту», - цытуе «Інтэрфакс» намесніка старшыні Федэрацыі прафсаюзаў Беларусі Андрэя Лук'яновіча.

У гэтай сувязі ФПБ звярнулася да ўрада з просьбай аказаць садзейнічанне ў рашэнні гэтага пытання. Ён таксама заўважыў, што ў прафсаюзы сталі паступаць скаргі ад насельніцтва з нагоды наяўнасці ў іх праблем па пагашэнні спажывецкіх крэдытаў, асабліва крэдыту на будаўніцтва жылля, у тым ліку на фоне паніжэння прыбытку з-за вымушаных адпачынкаў і няпоўнага працоўнага тыдня.

«ФПБ занепакоеная наяўнасцю прадпрыемстваў, якія працуюць па скарочаным працоўным тыдні», - сказаў А.Лук'яновіч. Ён таксама сказаў, што маюцца факты неаплачаных адпачынкаў па ініцыятыве наймальнікаў, масавых афармленняў прастояў з аплатай працаўнікоў 2/3 тарыфнай стаўкі. А.Лук'яновіч прывёў дадзеныя, у адпаведнасці з якімі ў сакавіку ў параўнанні з лютым колькасць працаўнікоў, якім былі прадстаўленыя адпачынкі па ініцыятыве наймальнікаў, вырасла на 47% да 51 тыс. чалавек. Колькасць працоўных з няпоўным працоўным тыднем - на 13,7% да 65 тыс. чалавек.

«Найбольшую занепакоенасць выклікае сітуацыя ў прамысловасці, дзе ў студзені-сакавіку 2009 года колькасць працаўнікоў, пераведзеных на няпоўны працоўны тыдзень вырасла ў 4,3 раза ў параўнанні з аналагічным перыядам мінулага года, а колькасць працаўнікоў, якім былі прадстаўленыя адпачынкі па ініцыятыве наймальнікаў у 4,6 раза», - адзначыў намеснік праўладавага прафсаюза.

Нагадаем, што шматлікія беларускія прадпрыемствы на мяжы спынення: заводы і фабрыкі пераходзяць на скарочаны працоўны тыдзень, рэзка зніжаюцца заработныя платы, уразаюцца прэміі і даплаты, пачынаюцца масавыя звальненні працоўных. Інфармацыя аб сур'ёзных эканамічных праблемах таго ці іншага прадпрыемства паступае з рэгіёнаў фактычна кожны дзень.