Прагнозы спраўджваюцца: у Менску пачаліся перабоі з валютай

Даляраў на продаж у сталічных пунктах абмену валют бракуе нават з раніцы.

Нацыянальны банк рэкамендаваў камерцыйным банкам узмацніць падмацаванне кас наяўнай валюты. Такім чынам, па словах прэс-сакратара НББ Анатоля Драздова, Нацбанк спрабуе прадухіліць ажыятажныя настроі на рынку наяўнай валюты, піша «Салідарнасць». Што жа стала прычынай чарговай хвалі чутак, якія прывялі да рэзкага росту попыту насельніцтва на замвалюту?

Чэргі з жадаючых набыць замежную валюту сёння можна нярэдка назіраць у абменных пунктах і банках. Купіць еўра і даляры без праблем можна не заўсёды — часам прыходзіцца чакаць, пакуль хто-небудзь з наведвальнікаў не здасць валюту.

«Нацыянальны банк на гэтым тыдні накіраваў у банкі ліст аб неабходнасці падмацавання валютных кас і прадухіленні ажыятажных настрояў на рынку наяўнай інвалюты», — сказаў Анатоль Драздоў, падкрэсліўшы, што НББ, як і раней, не ўводзіў і не планаваў увядзення якіх-небудзь абмежаванняў на рынку наяўнай замвалюты.

Драздоў канстатаваў, што ў другой палове мая тэндэнцыя чыстай прапановы замвалюты з боку насельніцтва, якая склалася за апошнія 2 месяцы, змянілася чыстым попытам на замвалюту.

«Насельніцтва стала актыўна скупляць інвалюту і ў выніку на рынку склалася невялікае перавышэнне попыту над прапановай. Асобныя банкі апынуліся не гатовыя да росту попыту на замвалюту з боку насельніцтва і гэтым тлумачацца асобныя выпадкі дэфіцыту наяўнай інвалюты ў абменных пунктах шэрагу банкаў», — растлумачыў А.Драздоў. Такім чынам, «дэфіцыт наяўнай валюты выкліканы няспрытнасцю асобных банкаў», — рэзюмаваў ён.

Можна выказаць здагадку, што ажыятажныя настроі насельніцтва сталі вынікам не толькі няспрытнасці банкаў. Як раз два тыдні таму, менавіта тады, калі, па словах Драздова, паўстала перавышэнне попыту над прапановай, з'явілася інфармацыя аб сакрэтным распараджэнні Нацбанка, паводле якога камерцыйным банкам рэкамендавалася не прадаваць валюту беларускім імпарцёрам. І, нягледзячы на тое, што 18 мая Анатоль Драздоў заявіў, што «ніякіх пастановаў з нагоды абмежаванняў продажу валюты на біржы або пазабіржавым рынку Нацыянальны банк не прымаў», безнаяўны валютны рынак краіны, па словах экспертаў, практычна паралізавала на тры дні.

Знайсці валюту ў абменніках у Менску дагэтуль складана. Напрыклад, у сераду, у 18.15 да пункта абмену валют на плошчы Перамогі выбудавалася чарга, паведамляе «Комсомольская правда в Беларуси».

– Я аб'ехаў увесь горад, мне патрэбная валюта на заключэнне кантракту, - паскардзіўся малады чалавек у строі і з дыпламатам. - Столькі часу на гэта марную!

– А валюта наогул ёсць? Ці мы дарма стаім? - цікавіліся нецярплівыя кліенты.

– Будзе, - упэўнена сказаў адзін з іх. - Я здаю.

У пункце абмену валют на плошчы Якуба Коласа чарга была не менш, а валюты не было наогул. Як і ў аддзяленні аднаго з найбуйных беларускіх банкаў на праспекце Незалежнасці, і ў перасоўным абменніку каля Палаца мастацтва.

- Прыходзіце заўтра! Зможаце купіць хоць паўтары тысячы, - абнадзеілі там.

Але і ў чацвер сітуацыя не палепшылася. У трох розных банках даляраў на продаж не было. У банку на вуліцы Платонова знайшлі ўсяго 200 у.а., у абменніку каля ЦУМа - 500. І гэта ў 11 раніцы.