Рэпартаж з беларуска-расейскай мяжы: Мытнікі ў рэжыме чакання
13- 17.06.2009, 12:39
Акрамя звыклых кіёскаў, якія прадаюць страхоўкі, і пунктаў абмена валютаў сёння раніцай на расейска-беларускай мяжы з'явіліся мытныя фургончыкі.
Раніцай 17 чэрвеня на пераходзе «Рэдзькі» (траса Берасце-Менск-Масква) прыпаркаваўся мікрааўтобус, у якім сядзелі супрацоўнікі мытні, піша «Комсомольская правда в Беларуси».
Нагадаем, напярэдадні ўвечары Мытны камітэт Беларусі абвесціў: З 9 раніцы 17 чэрвеня краіна ўводзіць узмоцнены кантроль грузаў на асноўных беларуска-расейскіх магістралях.
Ужо а палове на восьмую раніцы каля мытных фургончыкаў пачалася праца. Мытнікі пачалі ўсталёўваць на іх беларускі афіцыйны сцяг і плакат «Дарагія расіяне, прабачце, але гэта не віна беларусаў у тым, што вы церпіце нязручнасць на мяжы». Але не паспелі плакат замацаваць, як яго чамусьці згарнулі.
У гэты час журналістаў на мяжы ўжо было больш чым мытнікаў. Дзевяці раніцы яны чакалі, як сустрэчы новага года.
Але і ў 9 раніцы, і 9.15, і ў 9.30 на мяжы нічога не змянілася. Ніводную машыну з расейскім нумарамі мытнікі так і не спынілі.
Дальнабойшчыкі, якія чулі навіну пра беларуска-расейскую мяжу, тармазілі ля фургонаў самі.
– Усё па-старому? – цікавіліся яны.
– Так, – адказвалі мытнікі.
Легкавыя аўтамабілі праязджалі побач, нават не прытармазіўшы.
– У нас рэжым чакання, – патлумачыў журналістам адзін з мытнікаў.
– А чаму плакат знялі? – спытаў мытніка журналіст.
– Таму што прыйшоў такі загад з Менска. Мабыць, ідуць нейкія перамовы.
Нагадаем, што ўвоз у Расею 600 відаў беларускіх малочных прадуктаў быў забаронены Расспажыўнаглядам 6 чэрвеня з-за таго, што на іх не былі аформленыя дакументы ў адпаведнасці з расейскім тэхнічным рэгламентам на малако, якія набылі сілу ў снежні 2008 года. Пазней Расспажыўнагляд заявіў, што забараніў пастаўкі малочнай прадукцыі з Беларусі ў некаторых абласцях Расеі яшчэ па 800 найменнях.
Забарона Расспажыўнагляда з'явілася у перыяд рэзкага пахаладання адносінаў паміж Масквой і Менскам, выкліканага нежаданнем Расеі выдаваць абяцаны крэдыт у 500 мільёнаў даляраў.
