Жонка палітвязня Аўтуховіча перанесла нервовы зрыў

Алена Аўтуховіч ужо чатыры месяцы праходзіць курс рэабілітацыі пасля сур'ёзнага нервовага зрыву.

Пра гэта «Еўрарадыё» паведаміў праваабаронца Алег Воўчак.

«Супруга Аўтуховіча пакуль знаходзіцца на лячэнні - у яе вельмі цяжкі нервовы зрыў, -- кажа праваабаронца. -- Яна выпісала агульную даверанасць на мяне, я вяду яе справу. Яна проста не ў стане. Плача, хвалюецца і моліць Бога, каб са здароўем мужа ўсё было добра.

Датэлефанавацца Алене Аўтуховіч немагчыма ўжо з канца зімы.

Галадоўка Мікалая Аўтуховіча, якая доўжыцца з 16 красавіка, адбілася не толькі на яго здароўі, але і на здароўі сваякоў. Адвакат Павал Сапелка адзначае, што фактычна «увесь час Мікалай Аўтуховіч праводзіць у ложку».

Ваўкавыскія прадпрымальнікі Юры Лявонаў, Мікалай Аўтуховіч і Уладзімір Асіпенка былі затрыманыя 8 лютага.

Праваабаронцы лічаць затрыманых палітычнымі зняволенымі, звяртаючы ўвагу на тое, што Аўтуховіч і Лявонаў раней ужо былі асуджаныя і прызнаныя міжнароднай супольнасцю вязнямі сумлення. Мікалай Аўтуховіч абвясціў галадоўку 16 красавіка. Ён патрабуе ў найкарацейшыя тэрміны альбо перадаць справу ў суд, альбо змяніць усім падследным меру стрымання з утрымання пад вартай на падпіску аб невыяздзе.