Мядведзеў не хоча сустракацца з Лукашэнкай
41- 9.06.2009, 15:37
Прэзідэнт Расеі не збіраецца асобна сустракацца з беларускім кіраўніком на саміце АДКБ у Маскве.
Аб гэтым заявіла прэс-сакратар кіраўніка расейскай дзяржавы Наталля Цімакова, паведамляе «Інтэрфакс».
Цімакова адзначыла, што Дзмітрый Мядведзеў не плануе праводзіць двухбаковую сустрэчу з Аляксандрам Лукашэнкай падчас саміту АДКБ у Маскве.
«У цяперашні час ніякіх двухбаковых сустрэч падчас саміту АДКБ не плануецца, у тым ліку не плануецца і сустрэча з беларускім прэзідэнтам», - заявіла Цімакова ў аўторак падчас тэлефоннай прэс-канферэнцыі.
Нагадаем, што ў апошні час адносіны паміж Беларуссю і Расеяй абвастрыліся. Пасля абмену рэзкімі крытычнымі выказваннямі Расея адмовілася прадаставіць беларускім уладам другі транш крэдыту ў 500 мільёнаў даляраў. У сваю чаргу, Лукашэнка назваў дзеянні афіцыйнай Масквы «шантажом», заявіўшы, што расейскія ўлады патрабуюць ад Менска прызнання Паўднёвай Асеціі і Абхазіі. Апошнім эпізодам у адносінах, якія абвастрыліся, стала забарона боку Расеі на ўвоз 1300 найменняў беларускіх малочных прадуктаў.
Крэмль не мае намеру прымушаць іншыя краіны прызнаць незалежнасць Паўднёвай Асеціі і Абхазіі і не будзе каментаваць выказванні Лукашэнкі аб ціску, які нібыта здзяйсняецца на Менск з боку Масквы, заявіла Наталля Цімакова.
«Расея ў гэтым сэнсе не будзе здзяйсняць ніякага ціску ні на якія краіны з нагоды прызнання, — цытуе прэс-сакратара РІА Новости. — Таму гэтыя дзіўныя выказванні Аляксандра Рыгоравіча мы пакідаем без каментароў».
