За акцыю ў падтрымку палітвязняў арыштаваныя актывісты «Еўрапейскай Беларусі»
2- 1.07.2009, 9:11
Максім Вінярскі і Уладзімір Кумец правялі ноч у Цэнтральным РУУС Менска.
Учора актывісты грамадзянскай кампаніі «Еўрапейская Беларусь» вывесілі на мосце на вуліцы Няміга ў Менску расцяжку «Свабоду Аўтуховічу!». За гэта яны былі арыштаваныя супрацоўнікамі міліцыі. У дачыненні да затрыманых быў складзены пратакол па артыкуле 17.1 Кодэкса аб адміністрацыйных правапарушэннях (дробнае хуліганства).
Сёння актывістаў адвезлі ў Цэнтральны суд Менска.
Нагадаем што лідэры прадпрымальнікаў з Ваўкавыска Мікалай Аўтуховіч, Юры Лявонаў і Уладзімір Асіпенка былі затрыманыя 8 лютага 2009 года. Праваабаронцы лічаць арыштаваных палітвязнямі, звяртаючы ўвагу на тое, што Аўтуховіч і Лявонаў раней былі асуджаныя і прызнаныя міжнароднай грамадскасцю вязнямі сумлення. Мікалай Аўтуховіч трымае бестэрміновую галадоўку пратэсту з 16 красавіка. Ён патрабуе перадачы яго справы ў суд ці вызвалення пад падпіску аб невыяздзе.
