«Палатка» яшчэ «папрацуе» над пытаннем Паўднёвай Асеціі і Абхазіі
13- 1.07.2009, 12:04
Над пытаннем аб прызнанні незалежнасці Паўднёвай Асеціі і Абхазіі «беларускія дэпутаты» будуць працаваць у міжсесіённы перыяд.
Пра гэта паведаміў агенцтву «Інтэрфакс- Захад» у сераду старшыня камісіі па міжнародных справах і сувязях з СНД «палаты прадстаўнікоў» «нацыянальнага сходу» Беларусі Сяргей Маскевіч.
«Натуральна, мы будзем працаваць над гэтым пытаннем. У цяперашні час яно знаходзіцца ў нашай камісіі», - адзначыў Маскевіч.
«Відавочна, што для Расеі гэтае пытанне з'яўляецца важным. Але яно ніколі не ставілася імі ў якасці прынцыповага, асабліва значнага, пытання, якое магло б паўплываць на двухбаковыя адносіны», - сказаў кіраўнік парламенцкай камісіі, кажучы пра магчымую рэакцыю расейскіх калегаў на тое, што пытанне па Паўднёвую Асецію і Абхазію засталося неразгледжаным беларускім «парламентам» на вясновай сесіі.
Пры гэтым, адзначыў Маскевіч, «напэўна, незадавальненне ў той ці іншай ступені прысутнічае. Іншая справа, што з іх боку ёсць і разуменне», - сказаў беларускі «палатачнік».
Нагадаем, што на дадзены момант Паўднёвую Асецію і Абхазію прызнала толькі Расея. Таксама пытанне аб прызнанні выносіў на абмеркаванне прэзідэнт Нікарагуа, аднак парламент адхіліў яго прапанову. Астатнія краіны лічаць Абхазію і Паўднёвую Асецію часткай Грузіі.
Пра тое, што Беларусь прызнае незалежнасць Абхазіі Паўднёвай і Асеціі, Аляксандр Лукашэнка заявіў яшчэ ў верасні мінулага года. Пазней прэзідэнт непрызнанай Паўднёвай Асеціі Эдуард Какойты паведаміў, што беларускі кіраўнік яму асабіста абяцаў прызнанне незалежнасці ПА і Абхазіі. Затым палітычная кан'юнктура змянілася, а Лукашэнка адкрыта заявіў, што з прызнаннем незалежнасці «спяшацца не будзе».
У траўні прэзідэнт Абхазіі Сяргей Багапш прыняў кіраўніка адміністрацыі Лукашэнкі Уладзіміра Макея і першага намесніка кіраўніка яго справамі Мікалая Корбута. У адміністрацыі Лукашэнкі і Міністэрстве замежных справаў Беларусі адмаўляліся казаць пра мэты візіту беларускіх чыноўнікаў у непрызнаную рэспубліку.
18 траўня спікер Дзярждумы РФ Барыс Грызлоў заявіў, што беларускія ўлады абяцалі прызнаць незалежнасць тэрыторый Грузіі яшчэ ў красавіку.
У інтэрв'ю расейскім СМІ у пачатку чэрвеня Лукашэнка заявіў, што Расея патрабуе ад яго прызнання Паўднёвай Асеціі і Абхазіі ў абмен на крэдыты. Аднак шматлікія незалежныя эксперты ацанілі гэтую заяву як падлашчванне да Еўразвяза для атрымання еўрапейскіх грошай.
